ქუთაისის საველე სამედიცინო პუნქტებში მონიტორინგი ჩატარდა
ახალი კორონავირუსის გავრცელების პრევენციის ღონისძიებების ფარგლებში, ქუთაისში თავდაცვის ძალების მიერ მოწყობილ საგუშაგოებთან საველე სამედიცინო პუნქტების მონიტორინგი მიმდინარეობს.
დღეს დილიდან დაავადებათა კონტროლისა და საზოგადოებრივი ჯანმრთელობის ეროვნული ცენტრის იმერეთის სამმართველოს წარმომადგენლებმა და დასავლეთის სარდლობის მთავარმა სამხედრო ექიმმა საველე სამედიცინო პუნქტები შეამოწმეს. ისინი ადგილზე დააკვირდნენ, თუ რამდენად დაცულია სამედიცინო უსაფრთხოების ნორმები საველე პუნქტებში და როგორ მიმდინარეობს სამხედრო ექიმების მიერ მოსახლეობის თერმოსკრინინგი.
იმერეთის რეგიონში თავდაცვის ძალების მიერ 9 საკონტროლო-გამშვები პუნქტია მოწყობილი. თითოეულ საგუშაგოზე 3-კაციანი სამედიცინო ჯგუფია მობილიზებული, რომელიც სპეციალური ტანსაცმლითა და სამედიცინო აპარატურითაა აღჭურვილი. სამხედრო ექიმები საკონტროლო გამშვებ პუნქტებზე შემსვლელ და გამსვლელ ყველა პირს პირველად სამედიცინო შემოწმებას, მათ შორის თერმოსკრინინგს უტარებენ და საეჭვო სიმპტომების შემთხვევაში მოქალაქე საველე სამედიცინო პუნქტში მოწყობილ იზოლაციის ზონაში გადაჰყავთ. პუნქტში ექიმი ხელმეორედ სინჯავს მოქალაქეს, სიმპტომების შესახებ ინფორმაციას ამუშავებს, ეძიება მის კონტაქტებს და მაღალი ტემპერატურის დადასტურების შემთხვევაში ინფორმაციას დასავლეთ სარდლობის მართვის ცენტრსა და სასწრაფო სამედიცინო დახმარების ცენტრს აწვდის.
სამხედრო ექიმები სამოქალაქო საზოგადოების მხარდაჭერას გლობალური გამოწვევის წინააღმდეგ ბრძოლაში 24-საათიან რეჟიმში, როტაციის წესით, ახორციელებენ. დასავლეთ საქართველოში თავდაცვის ძალების მიერ მოწყობილ თექვსმეტივე ძირითად საგუშაგოსთან არსებულ საველე სამედიცინო პუნქტთან მობილიზებულია ე.წ. ამბულანსიც, რომელიც როგორც სამოქალაქო პირების, ისე სამხედროების გადაუდებელი დახმარებისთვის გამოიყენება.
სიახლეები
- "ჩვენ უნდა დავაწესოთ მიზანმიმართული სანქციები და მოვითხოვოთ მიხეილ სააკაშვილის გათავისუფლება"
- "მთავარია, მართლები ვიყოთ საკუთარი სამშობლოს და მისი ღირსეული მომავლის წინაშე, გელოდებით ყველას 29 აპრილს"
- 24-25 აპრილს, ღამის საათებში რიკოთის ძველ გვირაბში შეზღუდვები დაწესდება
- უცხოური ვალუტის ოფიციალური კურსი 24 აპრილისთვის
- ევროპის ისტორიული თერმული ქალაქების დელეგატები იმერეთის კურორტების სამკურნალო თვისებებს ეცნობიან