,,სალომე ზურაბიშვილი არის სიყვარული, სიკეთე და სილამაზე''-პრეზიდენტობის კანდიდატის მხარდამჭერი კონცერტი ქუთაისში
ქუთაისში სალომე ზურაბიშვილის მხარდამჭერი კონცერტი გაიმართა. ბესო კალანდაძემ, ნუგზარ კვაშალმა, ვახტანგ ტატიშვილმა და სხვა მომღერლებმა პრეზიდენტობის კანდიდატს მხარდაჭერა კიდევ ერთხელ გამოუცხადეს. საღამოს მსახიობი ბესო ბერულაშვილი უძღვებოდა. მისი თქმით, სალომე ზურაბიშვილი ქვეყნის კეთილდღეობის გარანტია.
,,ხელოვანებმა მივიღეთ გადაწყვეტილება, რომ მაქსიმალურად დავუჭიროთ მხარი სალომე ზურაბიშვილს, რათა საპრეზიდენტო არჩევნებში მის გამარჯვებასთან ერთად ქვეყანაში სიძულვილის ენა დასრულდეს. ღრმად ვარ დარწმუნებული, რომ ქალბატონი სალომე ამის გარანტი იქნება. მე პოლიტიკისგან შორს ვარ, მაგრამ როდესაც ვხედავ რა არის ჩემი ქვეყნისთვის უკეთესი, იმ გზას ვირჩევ, ამიტომ დღეს გადავწყვიტე, რომ აქ ვიყო“-აღნიშნა ბესო ბერულაშვილმა.
მომღერალ ნუგზარ კვაშალის თქმით, დღევანდელი კონცერტი განსაკუთრებით საპასუხისმგებლოა, რადგან იგი ქვეყნის მომავალს ეხება.
,,სულ მალე საქართველოს ბედი გადაწყდება. როგორი იქნება ჩვენი მომავალი ეს ხალხზეა დამოკიდებული. ხალხზე, რომელსაც ძალიან უჭირს; რომელიც დაიღალა ამდენი ჩხუბით, ამდენი ლანძღვა-გინებით, ეს ლანძღვა ისმის ტელევიზიიდან, რადიოდან, სოციალური ქსელიდან. დღეს ქუთაისში დავრწმუნდით რომ ასეა. ჩვენ დიდი სიყვარულით მოვდივართ. ქალბატონი სალომე უსაყვარლესი ადამიანია, მე მას ვიცნობ. ხომ იცით ფრაზა ჩემი და ვახტანგ ტატიშვილის სიმღერიდან: ,,მთავარია სამი რამე დედამიწაზე: სიყვარული, სიკეთე და სილამაზე“. ჩვენც ამ კონცერტით სიყვარულს, სიკეთეს და სილამაზეს ვემსახურებით. ეს სამივე არის ქალბატონი სალომე. არ მინდა ძველი რეჟიმი დაბრუნდეს, უნდა იყოს ახალი და ეს ახალი უკეთესობის მომტანი იქნება“-აღნიშნა ნუგზარ კვაშალმა.
ქუთაისის მოსახლეობა კონცერტს დადებითად აფასებს და ამბობს, რომ საპრეზიდენტო არჩევნების მეორე ტურში სალომე ზურაბიშვილის გამარჯვების შემთხვევაში ისინი უკეთეს მომავალს ელიან.
,,უკეთესობის იმედი მაქვს. კონცერტი ძალიან მომეწონა. სალომე ზურაბიშვილს, როგორც ქალ პრეზიდენტობის კანდიდატს, სოლიდარობას ვუცხადებ’’-აღნიშნავს ქუთაისის ერთ-ერთი მაცხოვრებელი.
სიახლეები
- სამარხვო ტორტი
- " ჩვენ აღარ გვჭირდება დამხობა, ან რადიკალური გადაწყვეტილებები - ჩვენი გზა ევროპისკენ - არჩევნების თემა ეს იქნება" - სალომე ზურაბიშვილი
- "რუსეთმა დაიწყო ჰიბრიდული სტრატეგია და ცდილობს, შეგვაჩეროს ევროკავშირში გაწევრიანების გზაზე და მათ, ცხადია, ეხმარება დღევანდელი ხელისუფლება - ეს არის რუსული კანონი, პუტინის კანონის ზუსტი ასლი" - პრეზიდენტი
- "ვინმე და რამე სამოქალაქო საზოგადოებას თუ აზიანებს, ეს არიან არასამთავრობო სექტორს ამოფარებული პარტიები, პოლიტიკაში ყოფნა უნდათ, მაგრამ გამოჩენა - არა" - არჩილ თალაკვაძე
- 18-მდე გაიზარდა ჩერნიგოვზე რუსეთის სარაკეტო დარტყმის შედეგად დაღუპულთა რიცხვი