საქართველოს განათლების, მეცნიერების, კულტურისა და სპორტის სამინისტრო იულიხის კვლევით ცენტრთან (FZJ) თანამშრომლობის არეალს აფართოებს
საქართველოს განათლების, მეცნიერების, კულტურისა და სპორტის სამინისტროსა და იულიხის კვლევით ცენტრს (FZJ) შორის ურთიერთგაგების მემორანდუმი გაფორმდა, რომელიც, საქართველოს უნივერსიტეტების კონსორციუმის „ქართულ-გერმანული სამეცნიერო ხიდი“ (GGSB) ფარგლებში, საქართველოსა და გერმანიას შორის გრძელვადიანი თანამშრომლობის განვითარებას ითვალისწინებს.
მემორანდუმს ხელი მინისტრმა მიხეილ ჩხენკელმა, იულიხის კვლევითი ცენტრის დირექტორთა საბჭოს თავმჯდომარემ ვოლფგანგ მარქუარდტმა და დირექტორმა ჰანს შტროერმა მოაწერეს.
აღნიშნული მემორანდუმის საფუძველზე საქართველოს უნივერსიტეტების კონსორციუმს „ქართულ-გერმანული სამეცნიერო ხიდი“ (GGSB), რომელსაც იულიხის კვლევით ცენტრთან (FZJ) რამდენიმეწლიანი თანამშრომლობა აკავშირებს, ქუთაისის საერთაშორისო უნივერსიტეტი (KIU) შეუერთდა.
მემორანდუმის ფარგლებში გათვალისწინებულია ქუთაისის საერთაშორისო უნივერსიტეტისა (KIU) და იულიხის კვლევითი ცენტრის ინსტიტუტებს შორის სასწავლო-სამეცნიერო კავშირების დამყარება. თანამშრომლობა დაგეგმილია სუპერკომპიუტინგის, მონაცემთა ანალიზისა და მანქანური სწავლების მიმართულებით. KIU ადრონული თერაპიის ცენტრი თანამშრომლობაში ჩაერთვება ბიოსამედიცინო, გამოყენებითი და სამედიცინო-ტექნიკური კვლევების მიმართულებით.
ურთიერთგაგების მემორანდუმის ფარგლებში გაგრძელდება თანამშრომლობა ივანე ჯავახიშვილის სახელობის თბილისის სახელმწიფო უნივერსიტეტის ორ ლაბორატორიასთან: SMART|AtmoSim_lab და SMART|EDM_lab, რომელთა სამეცნიერო კვლევის არეალი გაფართოვდება. დაგეგმილია ახალი ლაბორატორიის SMART|BioMedImage_lab დაარსება, რომელიც იმუშავებს სამედიცინო ტექნოლოგიების მიმართულებით.
იულიხის კვლევით ცენტრთან თანამშომლობის განახლებული მემორანდუმი, გარდა გერმანულ-ქართული საგანმანათლებლო დაწესებულებებს შორის თანამშრომლობის გაღრმავებისა, ითვალისწინებს ყველა საფეხურის სტუდენტებისთვის საგანმანათლებლო გაცვლითი პროგრამების განხორციელებას, სემინარების, საზაფხულო სკოლებისა და საგანმანათლებლო კვირეულების ჩატარებას, აგრეთვე, მოსწავლეთათვის ვორქშოპების ორგანიზებას.
სიახლეები
- აშშ რუსეთს ადანაშაულებს უკრაინელი სამხედროების წინააღმდეგ ქიმიური იარაღის გამოყენებაში
- "ბიძინა ივანიშვილის მიერ ორი დღის წინ გაკეთებული განცხადებები ჩვენი პარტნიორებისთვის ომის გამოცხადებაა - ის, რაც მიუღებელია მოსახლეობისთვის, მიუღებელია პრეზიდენტისთვის'' - სალომე ზურაბიშვილი
- დღეს ტაძრებში დიდი ხუთშაბათის მსახურება შესრულდება
- დღეს პარლამენტში დაგეგმილი ბიუროს და პლენარული სხდომები არ გაიმართება - შენობაში 14:00 საათამდე უსაფრთხოების წითელი დონე იმოქმედებს
- "საქართველო ევროკავშირის კანდიდატი ქვეყანაა და მის ხელისუფლებას მოვუწოდებ, რომ მშვიდობიანი შეკრების უფლება უზრუნველყოს " - ჯოზეფ ბორელი