უკრაინამ „ვაგნერელების“ და „კადიროველების" ტყვეობაში მყოფი მებრძოლები დაიბრუნა
უკრაინამ დაიბრუნა რუსეთის ტყვეობიდან გათავისუფლებული კიდევ 95 მებრძოლი. ზოგიერთი მათგანი „ვაგნერელების“ და „კადიროველების" ტყვეობაში იყო.
ტყვეებთან მოპყრობის საკოორდინაციო შტაბის ინფორმაციით, რთული მოლაპარაკებების შედეგად გაათავისუფლეს შეიარაღებული ძალების 51 სამხედრო, ეროვნული გვარდიის 29 მებრძოლი, 11 მესაზღვრე და 4 მეზღვაური. მათი ნაწილი რუსული კერძო სამხედრო კომპანია „ვაგნერის“ და ჩეჩნეთის მეთაურ კადიროვის კონტროლქვეშ მყოფი ბატალიონის, „ახმატის“ ტყვეობაში იყო. გათავისუფლებული არიან ქალაქ მარიუპოლის, კუნძულ ზმეინის და ხარკოვის, ზაპოროჟიეს, ხერსონის, ლუგანსკის და სუმის ოლქების დამცველები.
უკრაინის საკოორდინაციო შტაბის ცნობით, ყოფილი ტყვეებიდან 4 მძიმედ დაჭრილია. ერთის წონა 30 კილოგრამითაა შემცირებული. რუსეთის ტყვეობიდან გათავისუფლებულ უკრაინელ მებრძოლებს რეაბილიტაციის კურსს ჩაუტარებენ.
95 მებრძოლის სანაცვლოდ, უკრაინამ რუსეთს გადასცა 94 სამხედრო მოსამსახურე. რუსეთის თავდაცვის სამინისტროს ინფორმაციით, გათავისუფლებული ტყვეები 11 ივნისს მოსკოვში ჩაიყვანეს.
უკრაინა და რუსეთი ტყვეებს გარკვეული პერიოდულობით ცვლიან. კიევის ინფორმაციით, ტყვეობიდან, საერთო ჯამში, გათავისუფლებულია 2500-ზე მეტი უკრაინელი სამხედრო და სამოქალაქო პირი.
სიახლეები
- ფრიდონ ინჯია პარლამენტს სახელმწიფო გერბზე გაკეთებული დევიზის „ძალა ერთობაშია“ შეცვლას და მის ნაცვლად, „ენა, მამული, სარწმუნოების“ დაწერას სთავაზობს
- "ახლა რაც ხდება არის ბრძოლა მომავალსა და წარსულს შორის, ფრონტის ხაზი გავლებულია და დარწმუნებული ვარ, ის მომავლის გამარჯვებით დასრულდება" - გია ხუხაშვილი
- „ჩვენი ერთობლივი მომავალი ევროპაშია!“ - ზურაბიშვილი ზელენსკის ტელეფონით ესაუბრა
- პაპუაშვილმა „ქარაფშუტა პოლიტიკოსი“ უწოდა გერმანიის ბუნდესტაგის საგარეო კომიტეტის თავმჯდომარეს
- "ლაზარე გრიგორიადისს სპეცრაზმის თანამშრომლები მივარდნენ, ვიდრე პოლიციის მანქანაში ჩასვამდნენ, მანამდე სცემეს, ძირს დააწვინეს და ურტყეს, აგინებდნენ - დაზიანებები სახეზე და თავზე აქვს, ბორკილებისგან დაწითლებული აქვს ხელები " - ადვოკატი