March 29, 2024

2020 წელს მთავრობა საგარეო ვალს 6.1 მილიარდი ლარით ზრდის

2020 წელს მთავრობა საგარეო ვალს 6.1 მილიარდი ლარით, ხოლო საშინაო ვალს 1.8 მილიარდი ლარით ზრდის.

ამის შესახებ ფინანსთა სამინისტროს მიერ მომზადებულ კანონპროექტშია აღნიშნული, რომელიც 2020 წლის სახელმწიფო ბიუჯეტში ცვლილებებს ითვალისწინებს.

 

კერძოდ, კანონის პროექტის განმარტებითი ბარათის თანახმად, საშინაო ვალის ზრდა - 1 850,0 მლნ ლარია, მათ შორის 600,0 მლნ ლარი კომერციული ბანკების გრძელვადიანი ლარის ლიკვიდურობის მიზნით გამოშვებული და ბანკების სადეპოზიტო სერთიფიკატებში განთავსებული თანხაა. ხოლო საგარეო ვალის ზრდა საერთაშორისო პარტნიორებიდან დამატებით მოზიდული თანხების ჩათვლით, 6 187,6 მლნ ლარს შეადგენს.

 

ამასთან, საბიუჯეტო დეფიციტი მშპ-ს 2,5%-დან 8,5%-მდე იზრდება.

 

„დეფიციტის ზრდა რა თქმა უნდა, პირდაპირ კავშირშია მთავრობის ვალის მოცულობის ზრდასთან. არსებული პროგნოზის მიხედვით მიმდინარე წლის ბოლოსთვის ვალის მოცულობა მიუახლოვდება მშპ-ს 55%-ს. აღსანიშნავია, რომ საერთაშორისო პარტნიორებთან მოლაპარაკებების პროცესში განიხილებოდა ეკონომიკური ზრდის სხვადასხვა პროგნოზები და მიუხედავად იმისა, რომ საბაზისო სცენარად ჩამოყალიბდა რეალური ეკონომიკის შემცირება 4%-ის ოდენობით, თანხების მობილიზება განხორციელდა იმ მოცულობით, რომ რესურსების დეფიციტი არ შექმნილიყო არც პესიმისტური სცენარის განვითარების შემთხვევაში და არც პანდემიის გამო უფრო ხანგრძლივი ეკონომიკური შეზღუდვების შემთხვევაში. შედეგად მოვლენების მიმდინარე განვითარებიდან გამომდინარე ხდება ვალის აღება საბაზისო სცენარში ბიუჯეტის საჭიროზე მეტი ოდენობით,“ - აღნიშნულია განმარტებით ბარათში.

 

დოკუმენტის თანახმად, აუცილებელია მომდევნო წლებში მთავრობის ვალის ეტაპობრივი შემცირება და მაქსიმალურად მოკლე ვადებში კრიზისამდე არსებულ პარამეტრზე დაბრუნება. მომდევნო წლებში საბიუჯეტო დეფიციტის კონტროლის და მისი შემცირების ხარჯზე ყოველწლიურად გაგრძელდება ვალის მოცულობის შემცირება.

 

„აღნიშნული მიზნის მისაღწევად 2021 წლიდან მნიშვნელოვნად შემცირდება ვალის აღების მაჩვენებელი და შესაბამისად უკვე მომდევნო წელსვე ნაწილობრივ შემცირდება ვალის მოცულობა მშპ-სთან მიმართებაში,“ - ნათქვამია დოკუმენტში.

 

„საქართველოს 2020 წლის სახელმწიფო ბიუჯეტის შესახებ“საქართველოს კანონში ცვლილების შეტანის თაობაზე“ კანონის პროექტი საკანონმდებლო ორგანოში დღეს დარეგისტრირდა.

წაკითხვა 569 ჯერ
ჩვენს შესახებ

მოკლე ინფო

ჩვენი მთავარი პრინციპებია: სიზუსტე, ოპერატიულბა და დაბალანსებული ინფორმაციის მიწოდება.

ჩვენს შესახებ

საინფორმაციო სააგენტო „პირველი ნიუსი“ 2018 წელს შეიქმნა. ჩვენი სააგენტოს ვებგვერდზე ქვეყნდება მიმდინარე პოლიტიკური, ეკონომიკური, სოციალური, მსოფლიო, კულტურული, სპორტული და სხვა აქტუალური სიახლეები.  სიტყვისა და გამოხატვის თავისუფლება ადამიანის ერთ–ერთი ძირითადი უფლებაა. სწორედ ამ უფლების გამოყენებით ჩვენმა გუნდმა აიღო ვალდებულება, რომ საზოგადოებას დროულად მივაწოდოთ ამომწურავი, ობიექტური ინფორმაცია ფაქტებისა და მოვლენების დამახინჯების გარეშე.