კვარაცხელიას მომავალი მამის და აგენტის გადასაწყვეტი არ არის - „ნაპოლი“
იტალიური საფეხბურთო კლუბი „ნაპოლი“ ხვიჩა კვარაცხელიას აგენტს, მამუკა ჯუღელსა და მამას, ბადრი კვარაცხელიას აკრიტიკებს და აცხადებს, რომ კვარაცხელიას ბედს თავად კლუბი გადაწყვეტს.
„კვარაცხელიას აგენტის, მამუკა ჯუღელისა და მისი მამის, ბადრი კვარაცხელიას განცხადებებთან დაკავშირებით ნაპოლი იმეორებს, რომ მოთამაშეს კლუბთან კიდევ სამი წლის განმავლობაში აკავშირებს კონტრაქტი“, - წერს „ნაპოლი“ 17 ივნისს გავრცელებულ განცხადებაში.
„კვარაცხელია არ არის სატრანსფერო ბაზარზე. ნაპოლისთან კონტრაქტით დაკავშირებული ფეხბურთელის ბედს აგენტები და მამები კი არ წყვეტენ, არამედ კლუბი „ნაპოლი“. ამბის დასასრული“, - წერია განცხადებაში, რომელიც კლუბმა პლატფორმა X-ზე გამოაქვეყნა.
წინა დღეს, 16 ივნისს, ტელეკომპანია „იმედის“ ეთერში მამუკა ჯუღელმა და ბადრი კვარაცხელიამ, - რომლებიც მეგობრები არიან, - ხვიჩა კვარაცხელიას საფეხბურთო მომავალზე ისაუბრეს.
„ლიგაზე რომ გავლენ, გეუბნები ახლა... ეგენი ისევ ჩემპიონები გახდებიან, მაგრამ ეს იმას არ ნიშნავს, რომ კვარაცხელიას იქ დარჩენა უნდა. სხვანაირად არ გაიგოს ხალხმა“, - განაცხადა მამუკა ჯუღელმა.
შემდეგ თქვა, რომ მთელი ოჯახი კონცენტრირებულია ევროპის ჩემპიონატზე: „ბავშვსაც არაფერს არ ველაპაკებით... მე და მამამისს გვაქვს რაღაც თემებზე ლაპარაკი. მაგრამ, რა თქმა უნდა, ჩვენთვის ახლა პრიორიტეტია ლიგის გუნდი“, - თქვა ჯუღელმა პირდაპირ ეთერში.
სიახლეები
- "არ მომწონს, რაც უკრაინაში ხდება, რუსები გიჟებივით ბომბავენ"- ტრამპი
- სურსათის ეროვნული სააგენტო მოსახლეობას მოუწოდებს, არ შეიძინოს კვერცხი და ხორცპროდუქტები სავაჭრო ადგილებში, სადაც არ არის დაცული ჰიგიენური ნორმები და რეალიზაციის პირობები
- პარლამენტი ახალი რეგლამენტის მისაღებად ემზადება, რომლის თანახმად, ახალარჩეული პარლამენტის პირველი სხდომის გახსნის პრეროგატივა პრეზიდენტს აღარ ექნება
- მსოფლიო ტრამპის ადმინისტრაცია თავდაცვისთვის 1 ტრილიონი დოლარის ღირებულების ბიუჯეტის დამტკიცებას აპირებს
- ირაკლი ოქრუაშვილს 20-ათასიანი გირაო შეუფარდეს და ქვეყნის დატოვება აუკრძალეს