დიდ სავაჭრო ცენტრებთან დილიდან შეიქმნა გრძელი რიგები – შენობაში მყიდველს შეზღუდული რაოდენობით უშვებენ (ერთი ადამიანი 20 კვადრატულ მეტრზე). ნაკადი მკაცრად რეგულირდება და რიგი კი წინ ნელა მიიწევს. 

შეცვლილია სავაჭრო ობიექტების მუშაობის გრაფიკიც – დილის შვიდიდან საღამოს შვიდ საათამდე.

არსებულ სიტუაციაზე FirstNews.ge ქუთაისის მოსახლეობასა და გარემოვაჭრეებს გაესაუბრა.

"დაგვტოვეს ულუკმაპუროდ, ერთი თვეა სახლში ვზივართ, როგორ ვარჩინოთ შვილები -შვილიშვილები, ისევ ღარიბებს და გაჭირვებულ ფენას  არ მოგვეცა მუშაობის შესაძლებლობა. აბა გაიხედეთ სავაჭრო ცენტრებში რა ხდება და როგორი რიგებია.  იმათთვის არაა ვირუსი და პანდემია? ან არ უნდა გაეხსნათ, ან ყველა თანაბარ პირობებში უნდა ვყოფილიყავით. საახალწლოდ ჩვენც ვიშოვიდით ორ კაპიკს და გავახარებდი ჩემს შვიდსულიან ოჯახს. ყველა ჩემს ხელებსაა მიჩერებული. რა ვქნათ? როგორ მოვიქცეთ?  რატომ არ ზრუნავს მთავრობა ჩვენზე. რა მნიშვნელობა აქვს პანდემია დაგვხოცავს თუ შიმშილი."

ერთ-ერთი მოქალაქე ჩვენთან საუბარში აღნიშნავს: "არ გახსნეს ტრანსპორტი და ნახეთ, მაინც რა ხდება სავაჭრო ცენტრებში და აზრი? პენსიონერი დედისთვის მინდოდა წამალი? უბნის აფთიაქში არ იყო და მითხრეს ქალაქის ცენტრის მიმდებარე აფთიაქში იყო ეს წამალი. არ მყავს ტრანსპორტი და არც ტაქსის ფული მქონდა.   ფეხით წამოვედი გარეუბნიდან ცენტრამდე, 3 კილომეტრზე  მეტი და მე როდის მივალ სახლში ან დედა როგორ დამხვდება. ესაა რეალობა. მთავრობამ არასწორი გადაწყვეტილებაა მიიღო და ისევ გაჭირვებული ოჯახები ზარალდებიან სამწუხაროდ".

(რესპონდენტების თხოვნით მათ სახელსა და გვარს არ ვასაჯაროვებთ)