საკანონმდებლო ცვლილებებთან ერთად დეპუტატებმა იმსჯელეს "ქალაქ ქუთაისის მუნიციპალიტეტის ქონების საპრივატიზაციო და სარგებლობაში გასაცემი ობიექტების ნუსხის და გეგმის დამტკიცების შესახებ" დოკუმენტში შესატან ცვლილებებზე.

საკრებულოს გადაწყვეტილებით ქუთაისის მერს თანხმობა მიეცა ქალაქ ქუთაისის მუნიციპალიტეტის საკუთრებაში არსებული არამატერიალური ქონებრივი სიკეთე შპს "საფეხბურთო კლუბი ტორპედო ქუთაისის" (საიდენტიფიკაციო N212917183) 100%-იანი წილის ელექტრონული აუქციონის წესით (პირობებით) გასხვისების თაობაზე.

"ყველაზე კარგი გადაწყვეტილება იქნა მიღებული. ქუთაისის მერია "ქუთაისის ტორპედოს", საკუთარ 100% წილს ყიდის, გამოაქვს აუქციონზე. ის ვინ შეიძენს, ექნება გარკვეული პირობები. ის გააკეთებს ყველაფერს, რომ "ქუთაისის ტორპედომ" დაიბრუნოს ის სიმაღლეები, რაც ადრე ჰქონდა.  ეს, რა თქმა უნდა, გულშემატკივარსაც გაახარებს. ეს არის ყველაზე მნიშვნელოვანი საკითხი, რაც დღეს გადაწყდა," - განაცხადა საკრებულოს თავმჯდომარის მოადგილემ რამაზ ჩხიკვაძემ Firstnews.ge-თან საუბარში.

დღესვე, მიღებული გადაწყვეტილებით „ახალი კორონავირუსის (,,COVID-19”) გავრცელების გამო, 2021 წლის 3 მაისიდან 2021 წლის 12 მაისის ჩათვლით პერიოდში, ქალაქ ქუთაისში M2 (ავტობუსები 5 ტონამდე სრული მასით) და M3 (ავტობუსები 5 ტონაზე მეტი სრული მასით) კატეგორიების ავტოსატრანსპორტო საშუალებებით მომსახურების გამწევი კომპანიებისთვის განისაზღვრა ქალაქ ქუთაისის მუნიციპალიტეტის ადმინისტრაციულ საზღვრებში რეგულარული სამგზავრო გადაყვანის მარშრუტებზე ნებართვის გაცემის ფასის გადახდის ვალდებულებისაგან გათავისუფლებისა და 2021 წლის პირველ ივლისამდე ქალაქ ქუთაისის მუნიციპალიტეტის ადმინისტრაციულ საზღვრებში რეგულარული სამგზავრო გადაყვანის მარშრუტებზე ნებართვის გაცემის ფასის გადაუხდელობით დაგროვილი დავალიანების გადახდისათვის საშეღავათო პერიოდი.

დეპუტატებმა ასევე მოისმინეს ქალაქ ქუთაისის მუნიციპალიტეტის საკრებულოს ჯანდაცვისა და სოციალურ საკითხთა კომისიის მიერ გაწეული მუშაობის ანგარიში.