გახსნის ცერემონიალს იმერეთში სახელმწიფო რწმუნებული ზვიად შალამბერიძე, პირველი მოადგილე ლევან სანიკიძე, ქუთაისის მერი იოსებ ხახალეიშვილი, კუიავსკო-პომორსკის მარშალის მოადგილე სლავომირ კოპიშჩი, პოლონეთის კულტურის მინისტრის მოადგილე ვანდა ზვინოგროდსკა, პოლონეთის რესპუბლიკის საგანგებო და სრულუფლებიანი ელჩი საქართველოში მარიუშ მაშკიევიჩი დაესწრნენ.

ვლადისლავ რაჩკევიჩის ძეგლის გახსნა კიდევ ერთი წინგადადგმული ნაბიჯია ქართულ-პოლონურ ურთიერთობებში. 2014 წლიდან იმერეთის და კუიავსკო-პომორკის რეგიონების მეგობრობის ფარგლებში, არაერთი წარმატებული პროექტი და გაცვლითი პროგრამა განხორციელდა.

ქართულ-პოლონური ურთიერთობების ისტორიაში თვალსაჩინო ადგილი უჭირავს იმერეთის რეგიონს.

აღსანიშნავია, რომ პოლონეთის ქალაქი ტორუნი იმერეთის მხარესთან დაძმობილებულ კუიავსკო-პომორკის რეგიონს წარმოადგენს, სადაც უკვე გაიხსნა წარმოშობით ქუთაისელის და პოლონეთში მოღვაწე ქართველი სამხედრო პირის, ვიტალი უგრეხელიძის სახელობის მოედანი.

იმერეთსა და კუიავსკო-პომორკის შორის ურთიერთთანამშრომლობის ფარგლებში, სხვადასხვა ეტაპზე პროექტები განხორციელდა საგანმანათლებლო მიმართულებით, ასევე, ახალგაზრდებისთვის მოეწყო შემეცნებით სფეროში ერთობლივი პროგრამები, გარდა ამისა, მემორანდუმის ფარგლებში სოფლის მეურნეობის განვითარების, კულტურული ურთიერთობის გაღრმავების მიზნით ჩატარდა აქტივობები. პოლონეთის მიწვევით ქართულმა მხარემ არაერთ საერთაშორისო-ეკონომიკურ ფორუმშიც მიიღო მონაწილეობა.