"თავისუფლება სინდისის პატიმრებს!"- ამ სლოგანის ქვეშ გაერთიანებული პატიმრების ოჯახის წევრები, ნათესავები, მეგობრები, მეზობლები, კოლეგები და თანამოაზრეები მერიის წინ შეიკრიბებიან და ქუთაისის პოლიციის საქალაქო სამმართველოს მიმართულებით მსვლელობას მოაწყობენ.

"53 სინდისის პატიმარი ივანიშვილის ციხეშია. მათი გათავისუფლება პროტესტის ერთ-ერთი მთავარი მოთხოვნაა. ივანიშვილს და მის ქვეშევრდომებს ხმამაღლა გავაგონებთ ჩვენი წინააღმდეგობის ხმას. შემოგვიერთდით და შეუერთე შენი ხმა სინდისის პატიმრების გათავისუფლების მოთხოვნას!", - ამბობენ მარშის ორგანიზატორები.

სოლიდარობის მარში 19:00 საათზე დაიწყება და ქუთაისის გარდა, თბილისში, ზუგდიდსა და ბათუმში გაიმართება.

პროევროპული აქციის მონაწილეები ამბობენ, რომ უკანონოდ დაკავებულების სოლიდარობის ნიშნად და გათავისუფლების მოთხოვნით, საქართველოს სხვადასხვა ქალაქში მარში ყოველ პარასკევს მოეწყობა.

ქვეყანაში უწყვეტი პროტესტის 57-ე დღეა. საქართველოს ქალაქებში აქციები მას შემდეგ დაიწყო, რაც 28 ნოემბერს „ქართულ ოცნებაში" განაცხადეს, რომ მომდევნო ოთხი წლის განმავლობაში აღარ დააყენებენ ევროკავშირთან გაწევრიანებისთვის მოლაპარაკების გახსნის საკითხს.

მომიტინგეთა მოთხოვნები უცვლელია: ხელახალი საპარლამენტო არჩევნების ჩატარება და აქციებზე დაკავებულთა გათავისუფლება.

მოქალაქეები ამბობენ, რომ იბრძოლებენ მანამდე, ვიდრე მოთხოვნები არ დაკმაყოფილდება.