„გარდიანის“ ინფორმაციით, ეს მსოფლიო პატრიარქის მიერ გაკეთებული იშვიათი პოლიტიკური განცხადებაა.

კონსტანტინოპოლის ეკლესიის მეთაურმა აღნიშნულის შესახებ წირვის დროს განაცხადა, რომელსაც საბერძნეთის პრემიერ-მინისტრი კირიაკოს მიცოტაკისი ესწრებოდა.

"ჩვენ ვუყურებთ უკრაინელი ხალხის დრამას და აღფრთოვანებული ვართ მათი ძლიერი წინააღმდეგობით დამპყრობლის წინააღმდეგ", - აღნიშნა პატრიარქმა ბართლომემ ამბიონიდან.

მართლმადიდებლური სამყაროს სულიერმა წინამძღოლმა ქადაგებისას გაეროს წესდებაც ახსენა, რომელიც მისი თქმით, ცალსახად კრძალავს ძალადობის გამოყენებას საერთაშორისო ურთიერთობებში და ავალდებულებს ორგანიზაციის ყველა წევრს, მოაგვარონ უთანხმოება მშვიდობიანი გზით.

„ჩვენ მოვუწოდებთ სასწრაფოდ ცეცხლის შეწყვეტისკენ... ომი უნდა დასრულდეს. უსამართლო ომი ხდება ევროპის გულში, იღვრება ადამიანის სისხლი, კლავენ ბავშვებს და ქალებს და ანადგურებენ ქალაქებსა და სოფლებს. ჩვენი ფიქრები ჩვენი ძმებისკენაა მიმართული“, - დასძინა მსოფლიო პატრიარქმა.

მოგვიანებით, მან მადლობა გადაუხადა საბერძნეთის პრემიერ-მინისტრს უკრაინის დახმარებისთვის, რა დროსაც ოფიციალურმა ათენმა კიევს კალაშნიკოვისა და სხვა სახის იარაღი გაუგზავნა.