ვრცელი ინტერვიუს დროს ოლაფ შოლცს ჰკითხეს, რატომ ფიქრობს, რომ უკრაინისთვის ტანკების მიწოდებამ შესაძლოა, ბირთვული ომი გამოიწვიოს, რაზეც გერმანიის ლიდერმა უპასუხა, რომ არ არსებობს წესების სახელმძღვანელო, რომელშიც გაწერილი იქნება, როდის შეიძლება გერმანია ჩაითვალოს უკრაინაში მიმდინარე ომის მხარედ.

„სწორედ ამიტომ, მით უფრო მნიშვნელოვანია, რომ ჩვენ თითოეული ნაბიჯი ძალიან ფრთხილად განვიხილოთ და განვახორციელოთ ერთმანეთთან მჭიდრო კოორდინაცია. ნატო-ს მიმართულებით ესკალაციის თავიდან აცილება ჩემთვის მთავარი პრიორიტეტია. სწორედ ამიტომ, მე არ ვარ ფოკუსირებული გამოკითხვებზე, არ ვაძლევ ჩემს თავს უფლებას, გავღიზიანდე მომაბეზრებელი ზარებით. შეცდომის შედეგები შეიძლება, დრამატული იყოს“, – განაცხადა ოლაფ შოლცმა.

გერმანიის კანცლერმა ინტერვიუს დროს ასევე დაიცვა თავისი გადაწყვეტილება, არ შეწყვიტოს დაუყოვნებლივ რუსული გაზის იმპორტი.

„მე აბსოლუტურად არ მესმის, როგორ შეიძლება გაზის ემბარგომ დაასრულოს ომი. პუტინი რომ ყოფილიყო ღია ეკონომიკური არგუმენტებისთვის, ის არ დაიწყებდა ამ გიჟურ ომს. მეორე მხრივ, თქვენი ქცევით, თითქოს საუბარი ფულზეა, საუბარი კი დრამატული ეკონომიკური კრიზისის, მილიონობით სამუშაო ადგილის დაკარგვისა და ქარხნების დახურვის თავიდან აცილებაზეა“, – განაცხადა შოლცმა.

გერმანიის კანცლერის თქმით, ამას ექნება სერიოზული შედეგები არა მხოლოდ გერმანიისთვის, არამედ ევროპისთვის და უკრაინის აღდგენის მომავალი დაფინანსებისთვის.