ქვეყნის დასავლეთში მდებარე ქალაქ მაჰაბადში დემონსტრანტები შეეცადნენ ადმინისტრაციული შენობის დაკავებას. ამ დროს თეირანი ცდილობს საპროტესტო გამოსვლები დააკავშიროს შიიტთა მეჩეთზე თავდასხმასთან მაშინ, როცა მეჩეთზე თავდასხმაზე პასუხისმგებლობა იკისრა ისლამურმა სახელმწიფომ.

ირანის ქალაქებში გამოსვლები დაიწყო 16 სექტემბერს, თავსაფრის არასწორი ტარების გამო დაკავებული 22 წლის მაჰსა ამინის პოლიციის განყოფილებაში გარდაცვალების შემდეგ.

სოციალური მედიით 27 ოქტომბერს გავრცელებულ ვიდეოჩანაწერებზე ჩანს, როგორ შემოერტყა ადამიანთა დიდი ჯგუფი გუბერნატორის შენობას და ქვებს ესროდა მას. ამ დროს ისმის სროლის ხმა. ქალაქში მღელვარება გაიზარდა 35 წლის ისმაილ მოლუდის დასაფლავების შემდეგ. მოლუდი ისლამური რევოლუციის გუშაგთა კორპუსის თანამშრომლებმა საპროტესტო აქციის დროს მოკლეს.

ირანის ქალაქებში საპროტესტო აქციების მონაწილეებს პოლიცია სასტიკად უსწორდება. მოკლულია 200-ზე მეტი, დაშავებულია ასეულობით ადამიანი და დაკავებულია 13 ათასზე მეტი პირი.