მარინ ლე პენის მხარდამჭერთა პარტიამ, რომელსაც ახლა 29 წლის ჟორდან ბარდელა ხელმძღვანელობს, ეგზიტპოლების თანახმად, ევროპარლამენტის არჩევნებში მაკრონის მომხრეებზე ორჯერ მეტი ხმები მიიღო. ბარდელამ ადრე მოუწოდა მაკრონს დაითხოვოს პარლამენტი და დანიშნოს ახალი არჩევნები. ევროპარლამენტის არჩევნებში მესამე ადგილზეა სოციალისტური კოალიცია. ულტრამემარჯვენე პარტია „რეკონკისტამ“ ასევე მიაღწია წარმატებას.

საპარლამენტო არჩევნების პირველი ტური საფრანგეთში 30 ივნისს, მეორე კი 7 ივლისს გაიმართება.

ევროპარლამენტის არჩევნები ევროკავშირის ქვეყნებში კვირას დასრულდება. პირველი ოფიციალური წინასწარი შედეგები ევროპის დროით შუაღამის შემდეგ გამოცხადდება. თუმცა რიგ ქვეყნებში უკვე გამოქვეყნდა ეგზიტპოლების შედეგები, რომლებიც რამდენიმე ქვეყანაში მემარჯვენეების წარმატებას ადასტურებენ.