“ღამით რუსეთმა დარტყმები ხარკოვისა და სუმის ოლქებიდან ლვოვამდე და ბუკოვინამდე განახორციელა. 20-ზე მეტი რაკეტა და დრონების დიდი უმრავლესობა განადგურდა. მადლობა საჰაერო თავდაცვის ძალებს. რუსეთის საჰაერო თავდასხმები სწრაფი გადაწყვეტილებების მიღებას საჭიროებს და მისი შეჩერება სანქციების მეშვეობით ახლავე შეიძლება. საჭიროა მეტი საჰაერო თავდაცვის სისტემა. ჩვენი პარტნიორებისგან არა მხოლოდ სიგნალებს, არამედ ისეთ ქმედებებს ველით, რომლებიც სიცოცხლეს გადაარჩენს”, - წერს ვოლოდიმირ ზელენსკი “იქსზე”, - წერს გაზეთი “რეზონანსი” სტატიაში სათაურით რუსეთი ახალ საბრძოლო ტაქტიკას იყენებს, კიევი კი სწრაფ რეაგირებას ითხოვს - რა მიმართულებით უჭირს უკრაინას.

“ამასთან, ზელენსკიმ ვიდეომიმართვაში განაცხადა: “არის მაღალი დონის პოლიტიკური სიგნალები - კარგი სიგნალები, მათ შორის შეერთებული შტატებისგან, ჩვენი ევროპელი მეგობრებისგან. ყველა მხრივ მიწოდებები აღდგენილია. გავაგრძელებთ მომდევნო კვირას ამერიკულ მხარესთან მუშაობას სამხედრო დონეზე, კერძოდ ჩვენი სამხედროები გენერალ კელოგთან ვამზადებთ ახალ ევროპულ თავდაცვით პაკეტებსაც. უახლოეს მომავალში ძლიერ ნაბიჯებს ველით რუსეთის წინააღმდეგ სანქციებზეც ამ ომისთვის: ზეწოლამ უნდა იმუშაოს”. საქართველოს სტრატეგიული ანალიზის ცენტრის გეოპოლიტიკური კვლევების ხელმძღვანელის, ვახტანგ მაისაიას შეფასებით, რუსები ახორციელებენ უკრაინელების საჰაერო და სარაკეტო საბრძოლო თავდაცვითი სისტემების გამოფიტვას. მისივე თქმით, სწორედ ამის განეიტრალებას ითხოვს ზელენსკი, რაც მისივე აზრით, ძალიან კარგი მინიშნებაა”, - აღნიშნავს გამოცემა.

“ზელენსკი აბსოლუტურად მართალია. რუსეთი გადავიდა ახალი ტიპის სტრატეგიაზე, პრინციპში ახალი არ არის, მაგრამ ადაპტირებული ვარიანტია. ეს არის გამოფიტვის სამხედრო სტრატეგია. ფაქტობრივად, ახლა რუსები ახორციელებენ უკრაინელების საჰაერო და სარაკეტო საბრძოლო თავდაცვითი სისტემების გამოფიტვას, მათ გამოშიგვნას და განადგურებას, რათა მოიპოვონ ჰაერში სრული ბატონობა. ეს არის რუსეთის დღევანდელი ხელმძღვანელობის მთავარი ამოცანა. რასაც, სამწუხაროდ, ისინი თანდათანობით წარმატებით ახორციელებენ. სწორედ ამაზე მიანიშნა ზელენსკიმ. ის ზუსტად იმას ითხოვს, რომ ამ გამოფიტვის ოპერაციის წინააღმდეგ კონკრეტული ნაბიჯები გადაიდგეს, რომ ჰაერიდან რუსებს ყოველგვარი შესაძლებლობა ჩაეხშოთ, რათა სტრატეგიული ინიციატივა მოიპოვონ საბრძოლო მოქმედებების დროს და ჰაერზე რუსეთის სრული დომინანტობის ეფექტი განეიტრალდეს”, - განმარტავს გამოცემის კორესპონდენტთან საუბრისას ვახტანგ მაისაია.

“ამაზეა საუბარი, რაზეც ზელენსკიმ ძალიან სწორად გააკეთა აქცენტი, როგორც უკრაინის უმაღლესმა მთავარსარდალმა. ამ კუთხით მინდა გითხრათ, რომ ზელენსკი არა მხოლოდ გამოცდილი პოლიტიკოსი გახდა, არამედ სამხედრო სტრატეგიულ საკითხებში დიდი გამოცდილება მიიღო და გარკვეული სტრატეგიული ალღო შეიძინა. ეს მას გამოარჩევს სხვებისგან, თუნდაც რუსეთის უმაღლეს მთავარსარდალ პუტინისგან, რომელსაც ასეთი მიდგომები არ გააჩნია. ასე რომ, ზელენსკიმ ზუსტად დაინახა პრობლემა აღნიშნა კიდეც. ეს აბსოლუტურად სწორი მინიშნება იყო”, - დასძენს მაისაია.