ირანში ინფიცირების პიკი 30 მარტს დაფიქსირდა, როდესაც ერთ დღეში ინფიცირებულთა რაოდენობა დაახლოებით 3 200-ით გაიზარდა. ამ პერიოდის შემდეგ, ინფიცირებულთა რაოდენობამ იკლო, თუმცა 4 ივნისს 24 საათში კორონავირუსით 3 600  ადამიანი დაინფიცირდა.

ირანში ბოლო 24 საათში ახალი კორონავირუსით ინფიცირებულთა რაოდენობა 2 886-ით გაიზარდა. ამის შესახებ განცხადება ქვეყნის ჯანდაცვის მინისტრის პრესსპიკერმა, კიანუშ ჯაჰანპურმა გააკეთა.

რა არის ირანში კორონავირუსის მეორე ტალღის მიზეზი, უცნობია. მხოლოდ ის შეიძლება ითქვას, რომ ხელმეორედ ინფექცია ირანში ავღანეთიდან შეიძლებოდა გავრცელებულიყო, სადაც ოფიციალური მონაცემების თანახმად, კორონავირუსის შემთხვევები იზრდება.

ჯანდაცვის მინისტრის თქმით, ქვეყანაში ახალი კორონავირუსის ინფექცია სულ 169 425 ადამიანს დაუდგინეს, მათგან 132 000-ზე მეტი ადამიანი გამოჯანმრთელდა.

გარდაცვლილია 8 209 პაციენტი. ბოლო დღე-ღამეში კორონავირუსს 75 ადამიანი ემსხვერპლა.