ჰარცელმა ამომრჩეველს აქტიურობისკენ მოუწოდა.

"დღეს ეს არის ჩვენი პირველი გაჩერება. დავიწყეთ მეორე ტურის მიმოხილვა და დაკვირვება. დღეს არის არჩევნების დღე და ამიტომ, ეს არ არის ის მომენტი, როდესაც ჩვენ უნდა ვილაპარაკოთ პოლიტიკაზე, მეც და ჩემნაირებმა, არამედ ეს არის ის მომენტი, როდესაც ხალხი უნდა გამოვიდეს და თვითონ გააკეთოს პოლიტიკა. არჩევნების დროს, თუ რა ხდება და რა არჩევანი უნდა გაკეთდეს ქვეყანაში, წყვეტენ ისინი, ვინც მოვლენ საარჩევნო უბანზე და ვინც ხმას მისცემს თავიანთ კანდიდატს. ამიტომ, მოვუწოდებ ყველა ამომრჩეველს, რომ მოვიდნენ არჩევნებზე, მისცენ ხმა და ამით მონაწილეობა მიიღონ ამ პროცესში. რაც უფრო მეტი ამომრჩეველი მოვა, მით უკეთესია. მე ვუსურვებ ყველა ამომრჩეველს, რომ შეძლონ საკუთარი არჩევანის გაკეთება მშვიდობიან გარემოში. ისევე როგორც თქვენ, მედიის წარმომადგენლებს, ასევე იმუშაოთ მშვიდ გარემოში. მინდა, მადლობა გადავუხადო ყველა იმ ადამიანს, ვინც მუშაობს საარჩევნო სისტემაში იმისთვის, რომ ასე დილაადრიანად დაიწყეს სამუშაო პროცესი და გვიან ღამემდე გააგრძელებენ“, – განაცხადა კარლ ჰარცელმა.

ჰარცელის თქმით, საქართველოში საარჩევნო პროცესსოდირის სრულფასოვანი მისია აკვირდება და მათთან ერთად ევროპარლამენტარების მისიაც მუშაობს.

"ძალიან მოხარული ვარ, რომ ოდირის სრულფასოვანი მისია არის ადგილზე და მათთან ერთად მუშაობს ასევე ევროპარლამენტარების მისია, რომლებიც ახლა სხვადასხვა შეხვედრას ატარებენ. მათი წარმომადგენლები არიან როგორც თბილისში, ასევე საქართველოს რეგიონებში. დაველოდებით მათ შეფასებებს იმისთვის, რომ შემდეგ, დღის მეორე ნახევარში ევროკავშირის სხვა წევრი ქვეყნების ელჩებთან ერთად განვიხილოთ, თუ რა ხდება, როგორია საარჩევნო შედეგები“, – განაცხადა საქართველოში ევროკავშირის ელჩმა.