რუსეთში სახელმწიფო დუმის არჩევნები დასრულდა

რუსეთის ცენტრალური საარჩევნო კომისიის (ცესკო) მონაცემებით, არჩევნებზე წინასწარმა აქტივობამ 56,66% შეადგინა.

ცესკოს თავმჯდომარე ელა პამფილოვას თანახმად, ბიულეტენების 13,9%-ის დამუშავების შემდეგ მიღებული პირველი მონაცემების მიხედვით, ლიდერობს „ერთიანი რუსეთი“ (Единая Россия), რომელმაც ხმების 57,54% მოაგროვა. მას მოსდევს რუსეთის ფედერაციის კომუნისტური პარტია (КПРФ) 13,67%-ით. რუსეთის ლიბერალ-დემოკრატიულ პარტიას (ЛДПР) ხმა მისცა ამომრჩეველთა 9,2%-მა, „ახალ ხალხს“ (Новые люди) — 7,96%-მა, ხოლო „სამართლიან რუსეთს“ (Справедливая Россия) — 5,16%-მა. დანარჩენმა ხუთმა პარტიამ, რომლებიც კენჭს იყრიდნენ, ხმების 5%-ზე ნაკლები მოაგროვა და ახალი მოწვევის სახელმწიფო დუმაში წარმოდგენილი არ იქნებიან.

ეს მონაცემები ოდნავ განსხვავდება ეგზიტპოლების შედეგებისგან. საზოგადოებრივი აზრის შესწავლის სრულიად რუსეთის ცენტრმა (ВЦИОМ), რომელიც გამოკითხვებს რუსეთის 69 რეგიონის 1755 საარჩევნო უბნის გამოსასვლელთან ატარებდა, განაცხადა, რომ „ერთიან რუსეთს“ აქვს ხმების 49,4%, კომუნისტებს — 14,2%, ლიბერალ-დემოკრატიულ პარტიას – 10,7%, „ახალ ხალხს“ 9,7%, ხოლო „სამართლიან რუსეთს“ — 6,6%.

უცხოეთში არსებულ საარჩევნო უბნებზე ჩატარებული ეგზიტპოლების შედეგების მიხედვით, რომლებსაც მოძრაობების, „პროგრესისა“ (Прогресс) და „გაზაფხულის“ (Весна) დამოუკიდებელი საინიციატივო ჯგუფები ატარებდნენ, საზღვარგარეთ მცხოვრები რუსების ყველაზე მეტი ხმა პარტია „ახალმა ხალხმა“ მოაგროვა. ნიდერლანდში მას აქვს ხმების 57%, სერბეთში — 63%, გერმანიაში — 37%, ჩეხეთში — 49%, საფრანგეთში — 39%, პოლონეთში — 50%.

არჩევნებს თან სდევდა ცნობები საარჩევნო პროცესის შეფერხებებისა და დარღვევების შესახებ. მოსკოვში 20 სექტემბერს, დღისით, რამდენიმე უბანზე ტექნიკური შეფერხების საბაბით ამომრჩევლებისთვის ქაღალდის ბიულეტენების გაცემა შეწყვიტეს, ამომრჩევლებს სთავაზობდნენ დალოდებას ან ხმის ელექტრონულად მიცემას.

მრავალი რეგიონიდან შედიოდა ცნობები უბნებზე დამკვირვებლების არდაშვებისა და დაკავების შესახებ.

ცესკო ქვეყნის მასშტაბით კენჭისყრის წინასწარ შედეგებს 21 სექტემბრის დილას გამოაცხადებს.