ვაცნობიერებთ იმას, თუ რამდენად მნიშვნელოვანია „შუა დერეფანი“, მათ შორის ევროკავშირისთვის. კარგია, რომ დღეს უკვე საუბარი ღიად დაიწყო და ასევე კარგი იქნება ისიც, თუ კარგად გააცნობიერებს ევროკავშირი საქართველოს როლს „შუა დერეფნის“ რგოლში. იმიტომ, რომ საქართველოს ამ რგოლში ერთ-ერთი უმნიშვნელოვანესი ადგილი უჭირავს, თავისი თუნდაც გეოგრაფიული მდებარეობიდან გამომდინარე, – ამის შესახებ „დღის ქრონიკასთან“ პარლამენტის თავმჯდომარის მოადგილემ გიორგი კახიანმა ურსულა ფონ დერ ლაიენის დღევანდელ გამოსვლასთან დაკავშირებით განაცხადა.
„ცოტა ხნის წინ ლუქსემბურგში ჩატარდა დაკავშირებადობის სამიტი, რომელიც, ბუნებრივია, „შუა დერეფნის“ თემებსაც ეხებოდა და გვახსოვს, რომ იქ მიწვეული იყვნენ ცენტრალური აზიისა და სამხრეთ კავკასიის სახელმწიფოთა საგარეო საქმეთა მინისტრები და არ იყო მიწვეული საქართველოს საგარეო საქმეთა მინისტრი. ეს ყველაფერი ხომ ბევრ რამეზე მიუთითებს.
კარგია, რომ დღეს ასეთი მაღალი ტრიბუნიდან კიდევ ერთხელ ითქვა „შუა დერეფნის“ პროექტსა და მის მნიშვნელობაზე, ასევე მისასალმებელია, თუ ევროკავშირში კიდევ უფრო გააცნობიერებენ საქართველოს როლს ამ კუთხით და დამოკიდებულებაც შესაბამისი იქნება. ჩვენ მზად ვართ შესაბამისი ურთიერთობისთვის და ამისთვის ბევრ რამეს ვაკეთებთ, რომ ევროკავშირთან ურთიერთობები, მათ შორის „შუა დერეფნის“ განვითარების თვალსაზრისითაც კიდევ უფრო გაძლიერდეს და გაღრმავდეს“, – განაცხადა გიორგი კახიანმა.
ევროკომისიის პრეზიდენტი ევროპარლამენტში მოხსენებით გამოვიდა. ურსულა ფონ დერ ლაიენმა პრიორიტეტებზე ილაპარაკა და მათ შორის დაასახელა ჩინეთთან სავაჭრო კავშირების გამყარება. ასევე ილაპარაკა შუა დერეფანზე და დააანონსა სამიტის გამართვა.
„დღეს შემიძლია გამოვაცხადო ახალი საერთაშორისო დაკავშირებადობის პროექტი. ის სამხრეთ კავკასიასა და ცენტრალურ აზიას პირდაპირ დააკავშირებს ევროპის ბაზართან, რასაც ჩვენ შუა დერეფანს ვუწოდებთ“, – განაცხადა ურსულა ფონ დერ ლაიენმა.
