თქვენ თუ გჯერათ, რომ მამუკა მდინარაძე პოლიტიკიდან ღარიბაშვილის ნალაპარაკების გამო წავიდა, ეს თქვენი პრობლემაა – ყველამ უნდა შეიგნოს, რომ კორუფცია ძალიან ცუდია და კორუფციას წერილებითა და განცხადებებით ვერავინ გადაფარავს, – ამის შესახებ დღეს პრემიერ მინისტრმა ირაკლი კობახიძემ განაცხადა.
ჟურნალისტის კითხვაზე, ღარიბაშვილმა საკუთარი განცხადებებით შეუქმნა თუ არა დისკომფორტი ხელისუფლებას, კობახიძემ განაცხადა, რომ დისკომფორტია ის, როცა პრემიერ-მინისტრი კორუფციული ბრალდებით ციხეში ხვდება.
კიდევ ერთ კითხვას, ხედავს თუ არა ღარიბაშვილის პოლიტიკაში დაბრუნების პერსპექტივას, კობახიძემ უპასუხა, რომ როცა პირდაპირ კორუფციული დანაშაულია სახეზე, ამის არავითარი რესურსი არ არსებობს.
,,რა თქმა უნდა, ღარიბაშვილმა ჩვენს გუნდს დისკომფორტი შეუქმნა, რომ კორუფციის ბრალდებით მას ციხეში წასვლა მოუწია. ეს დისკომფორტია, რომელიც მან გუნდს შეუქმნა და რა თქმა უნდა, უმჯობესი იქნებოდა, რომ მას წარსულში ასეთი საქმიანობა არ ჰქონოდა. ბუნებრივია, ასეთ შემთხვევაში ნაკლები დისკომფორტი იქნებოდა.
კორუფცია არის ძალიან ცუდი და როდესაც ადამიანს კორუფციასთან დაკავშირებით ბრალდება აქვს წაყენებული და ეს ბრალდება არის დადასტურებული, ამას განცხადებებითა და წერილებით ვერანაირად ვერ ჩამოიწმენდ. ყველამ უნდა იზრუნოს საკუთარ წარსულზე და ყველამ უნდა შეიგნოს, რომ კორუფცია არის ცუდი.
ძალიან ბევრმა დაიწყო რაღაცებზე საუბარი, განცხადებების გავრცელება, მაგრამ ხელისუფლება მთლიანობაში იმდენად სუფთად მუშაობს, რომ არცერთ ასეთ მცდელობას არავითარი წარმატება არ ჰქონია – გუნდი ბიძინა ივანიშვილის ხელმძღვანელობით ძალიან სუფთად მუშაობს“, – განაცხადა ირაკლი კობახიძემ.
ჟურნალისტის კითხვაზე, ირაკლი ღარიბაშვილისა და გრიგოლ ლილუაშვილის სამართლებრივი პასუხისმგებლობა უნდა ითარგმნებოდეს თუ არა მის პოლიტიკურ პასუხისმგებლობაში, კობახიძემ განაცხადა, რომ როგორც კი პრობლემები დაინახეს, ქმედებებზე გადავიდნენ.
,,ამისთვის დროც დაგვჭირდა. მას შემდეგ, რაც პარტიული ყრილობა ჩატარდა, სადაც ბიძინა ივანიშვილმა კორუფციის რისკებთან დაკავშირებით შესაბამისი განცხადება გააკეთა, ერთ თვეში პრემიერ-მინისტრის თანამდებობა დავიკავე. იმ მომენტიდანაც ერთი წელი და ხუთი თვე დაგვჭირდა იმისთვის, რომ ყველაფერში ბოლომდე ჩაგვეხედა და გუნდში ვითარება გადაგველაგებინა. დღეს ჩვენ თამამად შეგვიძლია ვთქვათ, რომ ხელისუფლების მაღალ დონეზე კორუფცია სრულად აღმოფხვრილია. ოპონენტებს ხშირად ვეკითხებით, რომ მოიტანონ რომელიმე მინისტრთან დაკავშირებით თუნდაც ერთი კორუფციული ფაქტი, ყველას ვპირდებით, რომ მყისიერი რეაგირება იქნება, თუმცა ვერც ერთი ასეთი ფაქტი ვერ მოიტანს“, – განაცხადა ირაკლი კობახიძემ.
