უკრაინის პრეზიდენტის, ვოლოდიმირ ზელენსკის განცხადებით, რუსეთის მიერ კიევზე ბალისტიკური რაკეტებით თავდასხმის მთავარი სამიზნე ენერგეტიკული ინფრასტრუქტურა იყო. დაზიანებულია საცხოვრებელი კორპუსიც, სადაც მაშველები ხანძრის ჩაქრობას ცდილობენ.
ზელენსკის თქმით, უკრაინამ პარტნიორებისგან თავდასხმის შესახებ წინასწარი გაფრთხილება კვლავ ვერ მიიღო. მისივე განცხადებით, უკრაინის თავდაცვის სისტემებმა რაკეტები მხოლოდ მაშინ დააფიქსირეს, როდესაც ისინი კიევს მიუახლოვდნენ.
უკრაინის პრეზიდენტის ინფორმაციით, უკრაინის დაზვერვის ცნობებით, რუსეთი ახალი დარტყმებისთვის ემზადება.
„ფაქტები აჩვენებს, რომ რუსეთი თავს ვალდებულად არ მიიჩნევს, გაითვალისწინოს ის, რაც შეერთებული შტატების პრეზიდენტმა განაცხადა. უკრაინა ენერგეტიკულ ზავს დათანხმდა, რუსეთი კი კიდევ ერთ ელექტროსადგურსა და ჩვენი ხალხის სიცოცხლეს უმიზნებს“, – განაცხადა ზელენსკიმ.
მისივე თქმით, უსამართლობაა, რომ რუსეთი უკრაინის ენერგეტიკულ ინფრასტრუქტურას ანადგურებს, უკრაინა კი ბალისტიკური რაკეტების გაშვების შესახებ წინასწარ გაფრთხილებასაც ვერ იღებს.
ზელენსკიმ საერთაშორისო საზოგადოებას მოუწოდა, მომხდარს დუმილით არ შეხვდეს. მისი თქმით, მნიშვნელოვანია, შეერთებულმა შტატებმა დაინახოს, რა ხდება და ვინ არის პასუხისმგებელი ომის გაგრძელებაზე.
„ეს უსამართლობაა: ისინი ჩვენს ენერგეტიკულ ინფრასტრუქტურას ანადგურებენ, უკრაინა კი ბალისტური რაკეტების გაშვების შესახებ წინასწარ გაფრთხილებასაც კი ვერ იღებს. მნიშვნელოვანია, რომ მსოფლიომ ამაზე ხმა ამოიღოს. ასევე მნიშვნელოვანია, რომ შეერთებულმა შტატებმა რეალურად დაინახოს, რა ხდება და ვინ არის პასუხისმგებელი ამ ომის გაგრძელებაზე“, – წერს ზელენსკი.
უკრაინის პრეზიდენტმა მოქალაქეებს მოუწოდა, ამაღამ და ხვალ სიფრთხილე გამოიჩინონ.
