საქართველოს საპატრიარქოს დელეგაცია 19 ნოემბერს მოსკოვში ჩავიდა. მოსკოვის საპატრიარქოს ცნობით, ქართველი სასულიერო პირები მონაწილეობას მიიღებენ მოსკოვისა და სრულიად რუსეთის პატრიარქ კირილეს საიუბილეო ღონისძიებებში. კირილეს დღეს, 20 ნოემბერს, 80 წელი შეუსრულდა.
დელეგაციის წევრები არიან:
- ახალციხისა და ტაო-კლარჯეთის მიტროპოლიტი თეოდორე ჭუაძე;
- ზუგდიდისა და ცაიშის მიტროპოლიტი გერასიმე შარაშენიძე;
- გორისა და ატენის მიტროპოლიტი ანდრია გვაზავა;
- ნიკორწმინდელი ეპისკოპოსი ვახტანგ ლიპარტელიანი;
- პროტოპრესვიტერი გიორგი ზვიადაძე.
დელეგაციას თან ახლავს საქართველოში მოსკოვის საპატრიარქოს წარმომადგენელი, დეკანოზი ვლადიმერ ალექსანდროვი.
კირილეს იუბილეზე მოსკოვში ჩასულ სტუმრებს შორის არიან ანტიოქიის პატრიარქი იოანე X, იერუსალიმის პატრიარქი თეოფილე III, სერბეთის პატრიარქი პორფირე და ჩეხეთის მიწებისა და სლოვაკეთის მიტროპოლიტი როსტისლავი. მოსკოვში ჩავიდნენ ბულგარეთის, ალბანეთისა და მაკედონიის მართლმადიდებელი ეკლესიების დელეგაციებიც.
კირილე რუსეთის მართლმადიდებელ ეკლესიას 2009 წლიდან ხელმძღვანელობს. ის ღიად უჭერს მხარს უკრაინის წინააღმდეგ რუსეთის სრულმასშტაბიან ომს. ამის გამო მას სანქციები დაუწესეს, მათ შორის, უკრაინამ, დიდმა ბრიტანეთმა, კანადამ, ლიეტუვამ და ჩეხეთმა.







