ამაღლობელი 11 იანვრის ღამეს დააკავეს, ის უკვე მე-16 დღეა შიმშილობს.

„ვცდილობ, გენერალურ პროკურორს მივაწვდინო ხმა იმიტომ, რომ მივაწოდო მზია ამაღლობელის ჯანმრთელობის მდგომარეობის შესახებ ინფორმაცია. მას აქვს რამდენიმე ქრონიკული დაავადება და ის რეჟიმი, რომელშიც ის ცხოვრობს, შიმშილობის მე-16 დღე მისთვის შეიძლება ძალიან საზიანო იყოს.

მინდოდა, რომ გადაწყვეტილების მიმღებ პირებს რაიმე რეაქცია ჰქონოდათ. თქვენ იცით, რომ არავისგან გამოხმაურება არ გვაქვს - თითქოს არაფერი არ ხდება“, - უთხრა ეთერ თურაძემ რადიო თავისუფლებას.

მან აღნიშნა, რომ აღკვეთის ღონისძიების საკითხის გადაჭრა მხოლოდ გენერალურ პროკურორს შეუძლია და ამიტომ არის მისთვის მნიშვნელოვანი, პირისპირ შეხვდეს გენერალურ პროკურორს და მზია ამაღლობელის ჯანმრთელობის მდგომარეობის შესახებ მიაწოდოს ინფორმაცია.

„ჩემი შეხვედრის მთავარი მიზანია აღკვეთის ღონისძიება შეიცვალოს, რადგან მზია ვერანაირ გავლენას მოახდენს გამოძიებაზე და თუ ეს არ არის საჩვენებელი დასჯა, ის უნდა გამოუშვან“.

რადიო თავისუფლება ცდილობს პროკურატურის პრესსამსახურთან დაკავშირებას. პასუხის მიღების შემთხვევაში, ტექსტი განახლდება.

„საქართველოს ახალგაზრდა იურისტთა ასოციაცია“ აცხადებს, რომ მზია ამაღლობელის სიცოცხლეს საფრთხე ემუქრება და დაუყოვნებლივი მოქმედებაა საჭირო. საია, როგორც მისი უფლებების დამცველი ორგანიზაცია, მოუწოდებს იუსტიციის სამინისტროს, „დაუყოვნებლივ გააკეთოს განცხადება და პერიოდულად მიაწოდოს საზოგადოებას ინფორმაცია მზია ამაღლობელის ჯანმრთელობის მდგომარეობის შესახებ“.