უკრაინასთან დაკავშირებით პრესრელიზში აღნიშნულია, რომ, ქვეყანაში მიმდინარე ომის მიუხედავად, უკრაინა ევროინტეგრაციის გზაზე პროგრესს განაგრძობს და არაერთი მიმართულებით წინ წაიწია. ამასთან, ევროკომისია იმედს გამოთქვას, რომ უკრაინა დააკმაყოფილებს დარჩენილი სამი კლასტერის გახსნის პირობებს და იმუშავებს იმის უზრუნველსაყოფად, რომ ევროსაბჭომ შეძლოს ყველა კლასტერის გახსნა 2028 წლის ბოლომდე.

„რუსეთის დაუნდობელი აგრესიის მიუხედავად, უკრაინა კვლავ მტკიცედ ერთგულია ევროკავშირში გაწევრიანების გზის, წარმატებით დაასრულა სკრინინგის პროცესი და წინ წაიწია ძირითად რეფორმებში. უკრაინამ მიიღო კანონის უზენაესობის, საჯარო ადმინისტრირებისა და დემოკრატიული ინსტიტუტების ფუნქციონირების გზამკვლევები, ასევე ეროვნული უმცირესობების სამოქმედო გეგმა, რომელიც კომისიამ დადებითად შეაფასა. უკრაინამ დააკმაყოფილა კლასტერების გახსნისთვის საჭირო პირობები: ერთი (ფუნდამენტური), ექვსი (გარე ურთიერთობები) და ორი (შიდა ბაზარი). კომისია ელოდება, რომ უკრაინა დააკმაყოფილებს დარჩენილი სამი კლასტერის გახსნის პირობებს და მუშაობს იმის უზრუნველსაყოფად, რომ საბჭო შეძლებს ყველა კლასტერის გახსნას წლის ბოლომდე. უკრაინის მთავრობას აქვს მიზანი, რომ 2028 წლის ბოლომდე დახუროს გაწევრიანების მოლაპარაკებები. კომისია ვალდებულია, მხარი დაუჭიროს ამ ამბიციურ მიზანს, მაგრამ მიიჩნევს, რომ მის მისაღწევად საჭიროა რეფორმების ტემპის დაჩქარება, განსაკუთრებით ფუნდამენტური პრინციპების, კერძოდ, კანონის უზენაესობის თვალსაზრისით“, – ვკითხულობთ დოკუმენტში.

რაც შეეხება მოლდოვას, პრესრელიზში აღნიშნულია, რომ ქვეყანამ ევროკავშირში გაწევრიანების გზაზე მნიშვნელოვანი პროგრესი აჩვენა. ამასთან, ევროკომისია მოლდოვის ხელისუფლების მიზანს, რომ 2028 წლის დასაწყისში შეძლოს მოლაპარაკებების პროცესის დახურვა, ამბიციურს, თუმცა მიღწევადს უწოდებს.

„უწყვეტი ჰიბრიდული საფრთხეებისა და ქვეყნის დესტაბილიზაციის მცდელობების ფონზე მოლდოვამ მნიშვნელოვნად წინ წაიწია გაწევრიანების გზაზე, წარმატებით დაასრულა სკრინინგის პროცესი. 2025 წლის ივლისში გამართულმა ევროკავშირ-მოლდოვის პირველმა სამიტმა თანამშრომლობისა და ინტეგრაციის ახალი ეტაპი აღნიშნა. მოლდოვამ მიიღო კანონის უზენაესობის, საჯარო ადმინისტრირებისა და დემოკრატიული ინსტიტუტების ფუნქციონირების გზამკვლევები, რომლებიც კომისიამ დადებითად შეაფასა. კომისიის შეფასებით, მოლდოვამ დააკმაყოფილა კლასტერების გასახსნელად საჭირო პირობები: ერთი (ფუნდამენტური პრინციპები), ექვსი (გარე ურთიერთობები) და ორი (შიდა ბაზარი). კომისია ელოდება, რომ მოლდოვა ასევე დააკმაყოფილებს დარჩენილი სამი კლასტერის გასახსნელად საჭირო პირობებს და მუშაობს იმის უზრუნველსაყოფად, რომ საბჭო შეძლებს წლის ბოლომდე ყველა კლასტერის გახსნას. მოლდოვას მთავრობამ განაცხადა, რომ მიზნად ისახავს გაწევრიანების შესახებ მოლაპარაკებების დახურვას 2028 წლის დასაწყისისთვის. კომისია ვალდებულია, მხარი დაუჭიროს ამ მიზანს, რომელიც ამბიციურია, მაგრამ მიღწევადი, იმ პირობით, რომ მოლდოვა დააჩქარებს რეფორმების მიმდინარე ტემპს. რეფორმების იმპულსის შენარჩუნება გადამწყვეტია, რასაც აძლიერებს სექტემბერში არჩევნების შემდეგ ქვეყნის ევროპული გზისადმი პარლამენტის ძლიერი მხარდაჭერა“, – ნათქვამია პრესრელიზში.