მისი ადვოკატი არსებ ბაბაიანი განმარტავს, რომ ხაჩატურიანს ედავებიან, რომ დისკრედიტაციის მიზნით, 2018 წელს ნარკოტიკული საშუალება „ჩაუდო“ აქტივისტს, რომელიც ყოველთა სომეხთა პატრიარქის, გარეგინ II-ის წინააღმდეგ გამოდიოდა.

რადიო თავისუფლებასთან საუბარში ადვოკატი ბრალდებას „აბსურდულს“ უწოდებს: „ამაზე აბსურდული რამე არასოდეს გამიგია“, - ამბობს ის.

ადვოკატ ბაბაიანის შეფასებითვე, ეს „პოლიტიკური“ ბრალდება მიმართულია ხაჩატურიანის დისკრედიტაციისკენ და არის ნაწილი ნიკოლ ფაშინიანის მთავრობის უფრო ფართო „კამპანიისა ეკლესიის წინამძღოლის წინააღმდეგ“.

მღვდელმთავრისთვის აღკვეთის ღონისძიების სახით პატიმრობის შეფარდებაზე ხვალ იმსჯელებს მოსამართლე მაზის მელკონიანი, - იგივე მოსამართლე, რომელმაც წელს ორი არქიეპისკოპოსის, ბაგრატ გალსტანიანისა და მიქაელ აჯაპაჰიანისთვის პატიმრობის შეფარდების გადაწყვეტილება მიიღო.

გასულ შაბათს, 29 ნოემბერს, მღვდელმთავრების ჯგუფმა საჯარო მიმართვა გაავრცელა, სექს-სკანდალის „დაფარვაში“ დაადანაშაულა გარეგინ II და მოუწოდა მას, ნებაყოფლობით დატოვოს პოსტი. მიმართვას ხელს აწერს 10 სასულიერო იერარქი. მათგან რვას ორი დღით ადრე ფაშინიანმა უმასპინძლა მთავრობის ადმინისტრაციაში.

ეკლესიაში 55 ეპისკოპოსი და არქიეპისკოპოსია. გუშინ 27-მა მათგანმა გაავრცელა საჯარო განცხადება და გარეგინ II-ს მხარდაჭერა გამოუცხადა.