უგულავას თქმით, ეს არის ისტორიული ბრძოლა და საქართველოს ყველა მოქალაქე ბედნიერია, რომ ამ ბრძოლაში მონაწილეობის საშუალება მიეცა.

„ყველას მინდა, გულწრფელად ვუთხრა ნიშნის მოგების გარეშე: ამ ტალღას ვერავინ გააჩერებს. საქართველოს რუსეთში უკან ვერავინ შეათრევს, ამიტომ ეს არ ექვემდებარება ამას. რაც უფრო გაძალიანდება ხელისუფლება და ივანიშვილი, მით უფრო ცუდად დამთავრდება მათთვის. ნუ არევენ ქვეყანას. ამათ, როგორც ჩანს, მართლა ომი უნდათ - მთელ მსოფლიოს ომი გამოუცხადეს. ხალხს უნდა ევროპაში და საქართველო ივლის ევროპისკენ. ეს არის ჩვენი ისტორიული იდეა და შანსი. საქართველო აფხაზებთან და ოსებთან ერთად წავალთ ევროპაში. ესენი სთავაზობენ, რომ „ერთად რუსეთში“, არა მეგობრებო, ერთად ჩვენ წავალთ ევროპაში. ეს წყდება დღეს, ხვალ, ამ კვირებსა და თვეებში. ეს არის ისტორიული ბრძოლა და საქართველოს ყველა მოქალაქე ბედნიერია, რომ ამ ბრძოლაში მონაწილეობის საშუალება მიეცა“, - აღნიშნა გიგი უგულავამ.

ცნობისთვის, აქციის მონაწილეებმა, რომლებიც „უცხოური გავლენის გამჭვირვალობის“ შესახებ კანონპროექტს აპროტესტებენ, საკანონმდებლო ორგანოს წრე შემოარტყეს და ჯაჭვი შეკრეს.