“სწორი ინფორმაცია არ აქვთ, მხოლოდ კოლექტიური ნაცმოძრაობისგან იღებენ ინფორმაციას და ეს არახალია. მათი სატელიტები რომ არიან, ესეც დადასტურებულია არაერთგზის და ბუნებრივია, რომ ასეთ ადამიანებს რაც არ უნდა აუხსნა, აზრი არ აქვს, რადგან მათ სხვა მისია აქვთ. ძალადობა რა თქმა უნდა მიუღებელია, და იქ სადაც ძალის გადამეტება იყო, ყველგან საქმეა აღძრული და გამოძიება მიმდინარეობს“, – განაცხადა ზარქუამ.

ცნობისთვის, ევროპული საბჭო 19 დეკემბრის სამიტის შესახებ დასკვნას აქვეყნებს, სადაც საქართველოზეც არის საუბარი. ევროპული საბჭო „იმეორებს თავის სერიოზულ შეშფოთებას საქართველოს მთავრობის მიერ განხორციელებული ქმედებების მიმართ, რომელიც ეწინააღმდეგება ღირებულებებსა და პრინციპებს, რომლებზეც ევროკავშირია დაფუძნებული“. საბჭო მწუხარებას გამოთქვამს საქართველოს მთავრობის გადაწყვეტილებაზე, შეაჩეროს ქვეყნის ევროკავშირში გაწევრიანების პროცესი 2028 წლამდე.

„ევროპული საბჭო მკაცრად გმობს ძალადობას მშვიდობიანი მომიტინგეების, პოლიტიკოსებისა და მედიის წარმომადგენლების მიმართ. საქართველოს ხელისუფლებამ პატივი უნდა სცეს შეკრებისა და გამოხატვის თავისუფლების უფლებას და თავი შეიკავოს ძალის გამოყენებისგან. ძალადობის ყველა აქტი უნდა იყოს გამოძიებული და პასუხისმგებელმა პირებმა აგონ პასუხი. ევროპული საბჭო ხაზს უსვამს ევროკავშირის მზადყოფნას, მხარი დაუჭიროს ქართველი ხალხის ევროპულ მისწრაფებებს”, – წერია განცხადებაში.