როგორც ელისაშვილმა აღნიშნა, მნიშვნელოვანი იყო, რომ 100-ზე ნაკლები დეპუტატი ყოფილიყო, რადგან პარლამენტს ძალიან ბევრი ფუნქციის შესრულება გაუჭირდება.

„ძალიან საეჭვოდ ჟღერს, რომ გახარიამ არ მოითხოვა თავისი დეპუტაციისთვის მანდატების გაუქმება. რამდენი ხანია ოპოზიციას არ ვაკრიტიკებ, მიმაჩნია, რომ სამიზნეები უნდა გავასწოროთ, ახლა ერთმანეთზე თავდასხმების დრო არ არის, მაგრამ ეს გახარიამ უნდა ახსნას, რას ნიშნავს ეს ამბავი. მე არგუმენტები ვერ მოვისმინე, სიტუაციიდან გამოძრომის საშუალებას უფრო ჰგავს, ვიდრე რეალურ არგუმენტს, არადა არგუმენტების ჩამოყალიბება გახარიას ეხერხება. ფაქტია, რომ 49 დეპუტატს გაუუქმეს და სხვებს არა. კარგი იქნებოდა, რომ 100-ზე ნაკლები დეპუტატი ყოფილიყო, რადგან ძალიან ბევრი ფუნქციის შესრულება გაუჭირდება თვითონ პარლამენტს.

ასეთ რაღაცას ჰაერში, რომ დაკიდებ ე.ი. ტყუილ უბრალოდ არა. ალბათ, შესაძლო ვაჭრობისთვის. ძალიან დიდი მნიშვნელობა აქვს, რომ გახარიას პარტიამაც მანდატი დატოვოს. ქვეყანას ვკარგავთ. „ქართულ ოცნებას“ უნდა, დიქტატურა დაამყაროს. დღეს, რაც დააინიცირეს, ვიღაც მდინარაძეს თუ შეაგინებ დაგიჭერენ, მედიისთვის ცენზურის დაწესება - ასეთ დროს და ასეთ ვითარებაში კიდევ პრანჭვა და ცალკე დგომა ჩემთვის აუხსნელია. ამ დროს, ვინც ოპოზიციაშია და ყველა, ვინც კრიტიკულად მოაზროვნეა ერთმანეთისკენ უნდა გადავდგათ ნაბიჯები“, - განაცხადა ელისაშვილმა.

ამასთან, მან შეაფასა პრემიერ-მინისტრ, ირაკლი კობახიძის განცხადება იმასთან დაკავშირებით, რომ „პარლამენტში არ არის არცერთი „ნაცის“ ადგილი“.

ელისაშვილის თქმით, უმჯობესი იქნება „ქართულმა ოცნებამ“ „თავიანთი „ნაცებით“ დაიწყოს“.

„ნაციონალებით“ არის გამოტენილი „ქართული ოცნება“. აბუ-დაბიში ვინ იჯდა და ვინ გადაიხადა ჯარიმები? ერთი არის გოჩა ენუქიძე, რომელმაც ჯარიმები გადაუხადა ზარქუას და სანიკიძეს. ის ტიპი, ვინც კადრებში წითელი მაისურით იჯდა გოჩა ენუქიძე იყო. 2-ჯერ იყო „ნაციონალების“ მაჟორიტარი დეპუტატი. ერთხელ 4 წელი შეეშალა და მეორეჯერ 4 წელი შეეშალა? თავიანთი „ნაცებით“ დაიწყონ. გივი მიქანაძე, რომ არის სტრასბურგში წასული, ციხეების უფროსი იყო , მათ შორის, „ციხის ბუნტი“ რომ იყო მაშინ“,- აღნიშნა ელისაშვილმა.