მდინარაძის თქმით, „ისფედის“ ინტერესი იყო საქართველოში ხელისუფლების ცვლილება და მეორე ფრონტი.

„რა უშლიდა ხელს იმას, რომ უბრალოდ მიეტანათ პროკურატურაში? არ ჰქონდა მცდელობა „ისფედს“, რომ გაყალბებული მონაცემები მიეტანა, თუმცა ვერაფერს ვერ გააყალბენ, რადგან პარალელური ხმის დათვლა უბნების მონაცემებზე დაყრდნობით ხდება. დარწმუნებული ვარ, პროკურატურა სიღრმისეულად გამოიძიებს ამ თემასაც კი, რატომ დაიგვიანეს ამდენი დღის განმავლობაში. ზოგადად, ქვეყნებს სხვა ქვეყნებში აქვთ მუდმივი ინტერესები. მეგობრული და საქველმოქმედო თანხები არ არსებობს და თუ ვინმე ფიქრობს, რომ ძალიან ვუყვარვართ ვიღაცას და საქველმოქმედო მიზნებით დებს საქართველოში ფულს, მასთან კამათსაც კი აზრი არ აქვს. ჩვენ უნდა ვიცოდეთ, რომ ყველა ქვეყანას გააჩნია საკუთარი ინტერესი და ამაში ხარჯავენ სხვა ქვეყნებში თანხას. ასეთ თანხებს ითვისებს მათ შორის „ისფედი“. ძალიან სამწუხაროა, რომ ეს ინტერესი იყო საქართველოში ხელისუფლების ცვლილება და მეორე ფრონტი, „ისფედი“ იღწვოდა ამისთვის. „ისფედში“ ჩადებული თითოეული ცენტი იხარჯებოდა, რომ საქართველო მომკვდარიყო, ეს გამოდგომოდა გლობალურ ძალებს, გლობალური ომის პარტიას და „დიფ სთეითს“ რუსეთის წინააღმდეგ ბრძოლაში. შეიძლება, რუსეთის წინააღმდეგ ბრძოლაში ეს გამოდგომოდათ ვიღაცებს, მაგრამ ჩვენ ფიზიკურად ვერ გადავრჩებოდით და დღეს ის ადამიანები, რომლთა ფიზიკური გადარჩენა ჩვენ უზრუნველვყავით, ისინიც კი ჯერჯერობით ბოლომდე ვერ ხვდებიან რასთან გვაქვს საქმე. დღეს თუ რომელიმე ადამიანი კიდევ ფიქრობს, რომ საქველმოქმედო ქვეყნები და საქველმოქმედო მიზნებით დახარჯული ათობით და ასობით მილიონი დოლარი არსებობს, მაშინ მათთან კამათსაც კი აზრი არ აქვს“, – განაცხადა მდინარაძემ.

ცნობისთვის, 5 მარტს ისფედ-ში განაცხადეს, რომ პროკურატურისგან მიიღეს წერილი, რომლითაც სთხოვენ საპარლამენტო არჩევნებზე ხმების პარალელური დათვლისა და მიღებული დასკვნების ამსახველი დოკუმენტაციის გაგზავნას.