მისი თქმით, ქართული საზოგადოება კარგად ხედავს იმ ორმაგ სტანდარტს, რასაც ზოგიერთი უცხოელი პოლიტიკოსი საქართველოსთან მიმართებით იყენებს.

„აშშ-ის პრეზიდენტ ტრამპსაც რომ თავი დავანებოთ, რომელმაც პირდაპირ თქვა – ვინც შეეხება პოლიციელს, მის ოჯახს დეპეშას გავუგზავნით, რომ გვამი მიიღოს სახლშიო, ლიბერალური ფაშიზმის ერთ-ერთმა ლიდერმა ბაიდენმაც განაცხადა, რომ ძალადობრივ აქციას კანონი არ იცავს, კანონი მხოლოდ მშვიდობიან აქციას ეხებაო.

გერმანიაში კი შს მინისტრმა პირდაპირ მოითხოვა, რომ ხუთი წლიდან შვიდ წლამდე გაეზარდათ ძალადობრივ აქციებზე დაკავებულთათვის სასჯელი. შესაბამისად, აშშ-ში, საფრანგეთში, ბრიტანეთში, გერმანიაში და ა.შ., პოლიციელი დაცულია.

საქართველოში თურმე პოლიციელს სილაც უნდა გააწნა, ქვა და „მოლოტოვის კოქტეილიც” ესროლო, დააზიანო და ეს თურმე გამოხატვის თავისუფლებაში ჯდება, ხოლო გერმანიაში, საფრანგეთში, ბრიტანეთში თუ აშშ-ში პოლიციელს არ უნდა შეეხო, თორემ ასეთ ადამიანს მოკლავენ და ოჯახს გვამს მიუტანენ – ეს რანაირი დემოკრატიაა? თუ ფრანგული, გერმანული და ამერიკული დემოკრატია სხვანაირად დაიწერა და ქართული – სხვანაირად? ზუსტად ამ ორმაგ სტანდარტს ხედავს ხალხი”, – აღნიშნა გურამ მაჭარაშვილმა.