საქართველოს საგარეო უწყების განცხადებით, მიუღებელია ნებისმიერი ქმედება, რომელიც უხეშად არღვევს საერთაშორისო სამართლის პრინციპებს და ნორმებს და მიმართულია რეგიონში ვითარების ესკალაციისკენ.

„საქართველოსა და აზერბაიჯანის რესპუბლიკას შორის არსებული მტკიცე მეგობრობისა და სტრატეგიული პარტნიორობის გათვალისწინებით, საქართველო გამოხატავს სოლიდარობას მოძმე აზერბაიჯანის მიმართ ამ რთულ ვითარებაში“, – ნათქვამია განცხადებაში.

ცნობისთვის, დღეს მედიით გაავრცელდა ინფორმაცია, რომ ქალაქ ნახიჩევანის აეროპორტის ტერიტორიაზე ირანული დრონი აფეთქდა. ადგილობრივი მედიის თანახმად, კიდევ ერთი დრონი სოფელ შეკარაბადში შეფრინდა.

მოგვიანებით განცხადება გაავრცელა ირანის შეიარაღებული ძალების გენერალურმა შტაბმა. ირანმა აზერბაიჯანზე დრონებით თავდასხმა უარყო.

აზერბაიჯანის პრეზიდენტმა, ილჰამ ალიევმა ნახიჩევანის ავტონომიური რესპუბლიკის ტერიტორიაზე დრონით თავდასხმას აზერბაიჯანის წინააღმდეგ უსაფუძვლო ტერორისტული აქტი და აგრესია უწოდა. ალიევმა აღნიშნა, რომ „ტერორისტულ აქტში დამნაშავეები უნდა დაისაჯონ“.