“ძალიან ადრე გამოჩნდა გრიპის ვირუსი, ასეთ ადრეულ პერიოდში გრიპის შემთხვევები უჩვეულოა”

სექტემბრის ბოლოს განსაკუთრებულ ყურადღებას იქცევს ორი ვირუსი: გრიპის ვირუსი და კორონავირუსი. გრიპის შემთხვევების გამოჩენა ასეთ ადრეულ პერიოდში უჩვეულოა, – ამის შესახებ იაშვილის სახელობის ბავშვთა ცენტრალური საავადმყოფოს სამედიცინო დირექტორმა, პროფესორმა ივანე ჩხაიძემ „ინტერპრესნიუსს“ განუცხადა.

ივანე ჩხაიძის თქმით, სექტემბრის მეორე კვირას პირველადი ჯანდაცვის რგოლის დაწესებულებებში პაციენტების მიმართვიანობამ მოიმატა, ხოლო გრიპის შემთხვევების გამოჩენას ადრეულ პერიოდში არ შეუქმნია დამატებითი დატვირთვა სტაციონარულ და პირველადი ჯანდაცვის რგოლში.

„დაავადებათა კონტროლის ეროვნული ცენტრის სტატისტიკის თანახმად, სექტემბრის მეორე კვირაში ჩანს, რომ ივნისი-აგვისტოს შემდეგ ძალიან ადრე გამოჩნდა გრიპის ვირუსი. მონაცემების თანახმად, წამყვანი ვირუსი რინოვირუსია – გაციების გამომწვევი ვირუსი. წესისამებრ, შემდეგნაირად ხდება: სანამ გრიპის ვირუსის მატება იქნება, რინოვირუსი წამყვან პოზიციებს იკავებს. აღსანიშნავია, რომ ლაბორატორიულად დადასტურებული შემთხვევების 69% არის რინოვირუსი, შემდეგ არის კორონავირუსი, დანარჩენი ორი ვირუსი კი არის H1, „ა“ ტიპის გრიპის ვირუსი. მისი ამჟამინდელი გავრცელება მოულოდნელია. კორონავირუსიც გამოჩნდა და მისი ხვედრითი წილი 13%-ს აღწევს.

ეს არ ნიშნავს, რომ გრიპის სეზონი დაწყებულია. ერთეული შემთხვევები იქნება სექტემბერ-ოქტომბერში, ხოლო გრიპის სეზონი და შემთხვევების მატება მოსალოდნელია ოქტომბრის ბოლოდან-ნოემბრის დასაწყისში. ყველა ეს ვირუსი იმართება პირველადი ჯანდაცვის რგოლის მიერ, შესაბამისად, სტაციონარიზაციის მაჩვენებელი გაზრდილი არ არის. ძალიან ცოტაა რესპირაციული ვირუსული ინფექციებით გამოწვეული ჰოსპიტალიზაცია, თუმცა შედარებით მოიმატა მიმართვიანობამ სექტემბრის მეორე კვირას პირველადი ჯანდაცვის რგოლის დაწესებულებებში. ეს ლოგიკურია: ამის უკან დგას არდადეგებიდან და შვებულებიდან მოსახლეობის დაბრუნება დახურულ სივრცეში. თუ რესპირაციულ-ვირუსულ ინფექციებს ავიღებთ, პირველადი ჯანდაცვის რგოლზეა დატვირთვა, სტაციონარებში მიმართვიანობა კი შემცირებულია“, – აღნიშნა ჩხაიძემ.

ამასთან, განმარტა, რომ გასული წლებისგან განსხვავებით, წელს ქვეყანაში გრიპის საწინააღმდეგო სამკომპონენტიანი ვაქცინა შემოვა. ვაქცინაციასთან დაკავშირებით კი დეტალურ ინფორმაციას ჯანდაცვის სამინისტრო გაავრცელებს.