კიევი გადარჩენის რეჟიმზე გადადის და მოუწოდებს იმ მცხოვრებლებს, რომლებსაც დედაქალაქის გარეთ მეგობრები ან ნათესავები ჰყავთ, განიხილონ დროებითი გადასვლის შესაძლებლობა, – ამის შესახებ კიევის მერმა ვიტალი კლიჩკომ სააგენტო AFP-სთან ინტერვიუში განაცხადა.
„რაც უფრო ძლიერდება ჩვენი ქალაქის დაბომბვა, ყოველდღიურად ვრცელდება ახალი ცნობები დანგრეული შენობებისა და დაჭრილი ან ტრაგიკულად დაღუპული ადამიანების შესახებ. დღეს მთავარია გადარჩენა“, – აღნიშნა კლიჩკომ.
მან ხაზგასმით აღნიშნა, რომ ის არ მოუწოდებს კიევის მოსახლეობას სრული ევაკუაციისკენ.
„ეს არის პუტინის მიზანი… პუტინისთვის საუკეთესო სცენარია, რომ ყველანი წავიდეთ და ჩვენი ცარიელი ქალაქები და ქვეყანა მას გადავცეთ“, – განაცხადა კლიჩკომ.
მანვე დასძინა, რომ ზამთრისთვის მზადების ფარგლებში ქალაქი ქმნის გათბობის სარეზერვო სისტემებს და ამარაგებს საწვავს, საკვებსა და სასმელ წყალს.
„რაც უნდა კარგად მოვემზადოთ, თუ საჰაერო თავდაცვის სისტემები ვერ გაუმკლავდება გამოწვევას, შესაძლოა ყველაზე ცუდი სცენარის წინაშე აღმოვჩნდეთ“, – აღნიშნა კიევის მერმა.
როგორც ცნობილია, რუსეთის პრეზიდენტმა ვლადიმერ პუტინმა გენერალ სერგეი სუროვიკინს დნეპრზე არსებული ხიდების განადგურება დაავალა, რათა კიევის პარალიზება მოხდეს.
