საქართველოს მეხუთე პრეზიდენტი, სალომე ზურაბიშვილი საფრანგეთში, პარიზში დიპლომატიური წრის წარმომადგენლებს შეხვდა. ამის შესახებ ინფორმაციას სალომე ზურაბიშვილი სოციალურ ქსელში ავრცელებს.
ასევე, მეხუთე პრეზიდენტი დიპლომატიურ კორპუსში უფრო აქტიური და მკაფიო პოზიციების დაფიქსირების აუცილებლობაზე საუბრობს.
მისი განცხადებით, ხელისუფლების მხრიდან მომდინარე ქცევის გამო ახალი დიპლომატები ხშირად სიფრთხილეს იჩენენ, მაშინ, როცა საზოგადოებას ქვეყნის შიგნით მტკიცე, დასავლური ხმის მოსმენა სჭირდება.
„უდავოა, რომ გვჭირდება უფრო ენერგიული და ნაკლებად შეზღუდული დიპლომატები. ახლად ჩამოსულები ხედავენ, თუ როგორ ექცევა ხელისუფლება მათ, ვინც პროტესტი გამოხატა, რის გამოც ცდილობენ, მოერგონ სიტუაციას და ფრთხილად იმოქმედონ. სწორედ დიპლომატები არიან ისინი, ვისაც ხალხი ხედავს და ვისი ხმაც ესმით. მოსახლეობას სჭირდება დაინახოს, რომ ქვეყანაში მტკიცე, ევროპული ხმა ისმის“, – წერს სალომე ზურაბიშვილი.
