საფრანგეთის ქალაქ მულუზში 17 ოქტომბერს, საპროტესტო აქციის სიახლოვეს 17 წლის გოგო თვალის არეში მძიმედ დაშავდა.
ქირურგიული ჩარევის მიუხედავად, მისთვის მარცხენა თვალში მხედველობის შენარჩუნება ვერ მოხერხდა.
ინფორმაციას TF1 ქალაქის პროკურორ ნიკოლა ჰაიტცზე დაყრდნობით ავრცელებს.
გამოცემა Politis-ის ცნობით, გოგო მეგობრებთან ერთად კვების ობიექტიდან გამოვიდა და ველოსიპედების წამოსაღებად მიდიოდა, როდესაც დემონსტრაციის სიახლოვეს აღმოჩნდა. თვითმხილველები აცხადებენ, რომ მას სახეში პოლიციის მიერ ნასროლი ცრემლსადენი გაზის ყუმბარა მოხვდა.
დაზიანების გამომწვევი მიზეზი ოფიციალურად ჯერ არ დადგენილა. პროკურატურამ გამოძიება დაიწყო, რაც საფრანგეთის ეროვნული პოლიციის გენერალურ ინსპექციას — IGPN-ს დაევალა.
