ქუთაისში საერთაშორისო მოკლემეტრაჟიანი ფილმების ფესტივალი იწყება
ქუთაისის საერთაშორისო მოკლემეტრაჟიანი ფილმების ფესტივალის მეექვსე გამოშვება 16-22 ოქტომბერს, ჩატარდება.
ერთი კვირის განმავლობაში, კინოთეატრ საქართველოში, ფესტივალი მაყურებელს მრავალფეროვან პროგრამას შესთავაზებს. კინოჩვენებებთან და რეტროსპექტივებთან ერთად, ფესტივალი გააერთიანებს: მასტერკლასებს, დისკუსიებსა, მუსიკალურ საღამოებსა და საჯარო ლექციებს.
წელს ფესტივალის ფოკუსში არა მხოლოდ ერთი ქვეყანა, არამედ ევროპა და ევროპული კინო მოექცევა.
მთავარ საკონკურსო პროგრამაში ჟიური გამოავლენს გამარჯვებულებს სამ კატეგორიაში: – საუკეთესო ფილმი, საუკეთესო რეჟისორი და საუკეთესო ოპერატორი და ფესტივალის პრიზს – ოქროს დინოზავრს გადასცემს.
ფესტივალის ჟიურის წევრები იქნებიან: კინორეჟისორი ანა ურუშაძე, პროდიუსერი და მსახიობი ჯასტინ ვედელი, კინოოპერატორი რეინ კოტოვი, პროდიუსერი რინგაილე ლესჩინსკიენე, მსახიობი ლუკა ჩიქოვანი, კინორეჟისორი და საქართველოს კინოინსტიტუტის პრეზიდენტი ნუცა ალექსი-მესხიშვილი კი ჟიურის თავმჯდომარე იქნება,
ფავორიტს გამოავლენს ახალგაზრდა კინოკრიტიკოსთა ჟიურიც, რომელიც კინოკრიტიკის სახელოსნოს მონაწილეებით იქნება დაკომპლექტებული.
გარდა საკონკურსო პროგრამისა, ფესტივალზე ნაჩვენები იქნება: უნგრული ახალი ტალღის ფილმები, იტალიური კინოკლასიკა: შრომა დრო და მეხსიერება, გოეთეს ინსტიტუტი საქართველოში წარმოგიდგენთ მოკლემეტრაჟიანი ფილმების სელექციას, ფრანგული ინსტიტუტი კი კრის მარკერის რეტროსპექტივას შემოგვთავაზებს, ვუჩვენებთ საბავშვო პროგრამას – უკრაინა ბავშვების ობიექტივში, სამეცნიერო-პოპულარულ დოკუმენტური ფილმებს, ასევე ნაჩვენები იქნება უახლესი ქართული მოკლემეტრჟიანი ფილმების პროგრამა და ქართული მოკლემეტრჟიანი კინოს პანორამა, კავკასუს სინემა წარმოგიდგენთ და სტუდენტური ფილმები. ფესტივალზე წელსაც ტრადიციულად აღინიშნება გამორჩეულ კინემატოგრაფისტთა საიუბილეო თარიღები, რეზო გაბრიაძის 90-ე იუბილეს აღსანიშნავად, ფესტივალს გახსნის ლევან გაბრიაძის ფილმი “ჰარი-ჰარალე, დედაო!”, ამასთანავე ფესტივალის ფარგლებში ვუჩვენებთ მისი სცენარებით გადაღებულ ფილმებს “ფეოლასა” და “ქვევრს”; ნანა მჭედლიძის მე-100 იუბილეს აღვნიშნავთ “პირველი მერცხლის” ჩვენებით; კინოოპერატორ ლევან პაატაშვილის მე-100 დაბადების დღეს კი თენგიზ აბულაძის “სხვისი შვილებით”; სესილია თაყაიშვილის მე-100 იუბილეს აღსანიშნავად კი მაყურებელი ლანა ღოღობერიძის “ფერისცვალებას” იხილავს.
ფესტივალის ფარგლებში დაიხურება ევროპული კინო-ტური საქართველოში, რის ფარგლებშიც ვუჩვენებთ ანიმაციურ ფილმ “დინებასა” და ევროპული მოკლემეტრაჟანი ფილმების სელექციას
2026 წელს გერმანული ექსპრესიონისტული კინოს გამორჩეულ ნამუშევარს, ფ.ვ მურნაუს ფაუსტს 100 წელი უსრულდება, სწორედ ამიტომ ფესტივალის ფარგლებში გაიმართება ფილმის ჩვენება ცოცხალი მუსიკალური გაფორმებით.
ფესტივალის ფარგლებში რეჟისორი დიმიტრი მამულია წაიკითხავს საჯარო ლექციას ნელ კინოზე. გაიმართება შეხვედრა მსახიობ ლუკა ჩიქოვანთან.
გაეროს მოსახლეობის ფონდის მხარდაჭერით კი გაიმართება პანელური დისკუსია რეგიონის ახალი ხედვა: ქალთა ხმები და რეპრეზენტაცია, ამასთანავე მაყურებელს საშუალება ექნება იხილოს სომხური მოკლემეტრაჟიანი ფილმების პროგრამა.
ფესტივალის სტუმრებს ტრადიციულად საშუალება ექნებათ დაესწრონ სრულმეტრაჟიანი ფილმების ქართულ და ქუთაისური პრემიერებს. ქართველი მაყურებელი პირველად იხილავს უტა ბერიას ,,ცრემლსადენ გაზს”, ანა ურუშაძის “მეორეხარისხოვან როლს” და ნანა ჯანელიძის ,,ქმნილების ხელოსანს”, რითაც ფესტივალი დაიხურება.
ქუთაისში პირველად იქნება ნაჩვენები: თამარ კალანდაძისა და ჟულიენ პებრელის ,,ქართლის ცხოვრება”, მაკა გოგალაძის ფილმები – “შენზე ვფიქრობდი ახლა” და ,,რაც თავი მახსოვს”, ინეკე სმიტსის “პუტინის დედა”, ივან სულუეტას “აღტაცება”, მარლენ ედოიანის “ცეცხლი იქ”.
ამასთანავე ფესტივალზე ვუჩვენებთ კოტე კალანდაძის დოკუმენტურ ნამუშევარს “არავინ არ ჩანს” და პაპუნა მოსიძის მხატვრულ ფილმ ,,ქალაქის ხმაურს”.
