ჩინელმა მეცნიერებმა ხელოვნური ინტელექტის მოდელი DAMO EAGLE შეიმუშავეს, რომელსაც საყლაპავის კიბოს, მათ შორის ადრეული და კიბოსწინარე დაზიანებების, გამოვლენა შეუძლია.
მოდელი Alibaba-ს კვლევითმა განყოფილებამ, DAMO Academy-მ სიჩუანის პროვინციის ონკოლოგიურ საავადმყოფოსა და სუნ იატ-სენის უნივერსიტეტის კიბოს ცენტრთან თანამშრომლობით შექმნა.
სისტემა გულმკერდის ჩვეულებრივ, კონტრასტის გარეშე კომპიუტერულ ტომოგრაფიას აანალიზებს და საყლაპავის შესაძლო სიმსივნურ ცვლილებებს ავლენს.
კვლევის მიხედვით, მოდელის მგრძნობელობამ საყლაპავის კიბოს გამოვლენისას 90% შეადგინა, ხოლო კიბოსწინარე დაზიანებების შემთხვევაში – 52.5%. კიბოს გამოვლენის ერთ-ერთ შეფასებაში სპეციფიკურობამ 98.5% შეადგინა.
მოდელი 80 ათასზე მეტ შემთხვევაზე, სამ ქვეყანაში, მრავალცენტრულად იქნა შემოწმებული. შესაბამისი კვლევა 22 სექტემბერს სამედიცინო ჟურნალ Nature Medicine-ში გამოქვეყნდა.
მკვლევრების განცხადებით, ტექნოლოგიის გამოყენებამ შესაძლოა გააფართოოს საყლაპავის კიბოს ადრეული სკრინინგის შესაძლებლობები, განსაკუთრებით იმ პაციენტებში, რომლებსაც გულმკერდის CT კვლევა სხვა მიზეზით უკვე ჩატარებული აქვთ.
