როგორც სააგენტო „როიტერი“ წერს, 4 აპრილამდე რუსეთს 649 მილიონი დოლარი უნდა გადაეხადა ორი სუვერენული ობლიგაციისთვის, თუმცა აშშ-ის სახაზინო დეპარტამენტმა ტრანზაქცია დაბლოკა, რითაც რუსეთს არ მისცა საშუალება, გამოეყენებინა თავისი გაყინული სავალუტო რეზერვები სესხის მომსახურებისთვის.

რუსეთის ხელისუფლება აცხადებს, რომ სასამართლოს მიმართავენ, თუ დასავლეთის ქვეყნები ეცდებიან, აიძულონ რუსეთს სუვერენული ვალის გამო დეფოლტის გამოცხადება.

„რა თქმა უნდა ჩვენ სასამართლოს მივმართავთ, რადგან ჩვენ ყველა აუცილებელი ნაბიჯი გადავდგით იმისთვის, რომ ინვესტორებმა თავიანთი გადახდები მიიღონ. ჩვენ სასამართლოში წარმოვადგენთ ყველა ჩვენს გადახდას, რაც დაადასტურებს ჩვენს მცდელობებს, გადავიხადოთ როგორც ვალუტაში, ისე რუბლით. ეს იქნება რთული პროცესი. ჩვენ მოგვიწევს ჩვენი სიმართლის ძალიან აქტიურად მტკიცება“, – განაცხადა რუსეთის ფინანსთა მინისტრმა ანტონ სილუანოვმა.

აღსანიშნავია, რომ სარეიტინგო სააგენტო Standard&Poor’s-მა რუსეთს „შერჩევითი დეფოლტის“ რეიტინგი მიანიჭა.

რუსეთს სუვერენული ვალის დეფოლტი 1917 წლის რევოლუციის შემდეგ არ გამოუცხადებია.