ახალგაზრდა ქალი ოჯახური ძალადობის გამო ჩრდილოეთ კავკასიიდან იყო წასული და ბოლო თვეებში ერევანში ცხოვრობდა.

სომხეთის პოლიციის ინფორმაციით, ბაიმურადოვას ცხედარი 19 ოქტომბერს აღმოაჩინეს. ოფიციალური ვერსიით, ძალადობის ნიშნები არ დაფიქსირებულა, თუმცა ტარდება ექსპერტიზა.

გოგონა 17 ოქტომბერს დაკარგულად გამოცხადდა. როგორც ადგილობრივი მედია წერს, ბაიმურადოვა ერევანში დამოუკიდებლად ცხოვრობდა და თანამშრომლობდა უფლებადამცველ ორგანიზაციებთან, რომლებიც ჩრდილოეთ კავკასიიდან წამოსულ ქალებს დახმარებას უწევენ.

„ეს ტრაგედია ხაზს უსვამს იმ საფრთხეებს, რომლებსაც განიცდიან ქალები, რომლებიც ცდილობენ თავი დააღწიონ პატრიარქალურ და ძალადობრივ გარემოს,“ – განაცხადეს ადამიანის უფლებათა დაცვის ცენტრში.

სომხეთის შინაგან საქმეთა სამინისტრო აცხადებს, რომ გამოძიება გრძელდება და ყველა შესაძლო ვერსია, მათ შორის, ძალადობრივი სიკვდილი, განიხილება.