რუსული ვაქცინის შეძენა მსოფლიოს 65 სახელმწიფოს სურს - უცხოური პრესა

ფრანგულ გაზეთ „ფიგარო“-ში («Le Figaro») გამოქვეყნებულია სტატია სათაურით „ევროპის ქვეყნები ვაქცინისათვის რუსეთს და ჩინეთს მიმართავენ“, რომელშიც განხილულია სიტუაცია ევროპის ქვეყნების დასავლური ვაქცინით უზრუნველყოფასთან დაკავშირებით (ავტორი - სტანისლას ფოიე).

 

ევროკავშირი თავისი წევრების მოთხოვნილებას ვერ აკმაყოფილებს ვაქცინის მიღების საკითხში, ამიტომაც ზოგიერთმა სახელმწიფომ გადაწყვიტა რუსეთსა და ჩინეთს მიმართოს ვაქცინის უკმარისობის დასაძლევად. მართალია, „ფაიზერის“, „მოდერნასა“ და „ასტრაზენეკა“-საგან განსხვავებით, არც რუსულ „სპუტნიკ-V“ და არც ჩინური კომპანიის Sinopharm-ის ვაქცინას ჯერ  სამკურნალო საშუალებების ევროპული სააგენტოში შემოწმება არ გაუვლია, მაგრამ ფაქტია, რომ მათ შესახებ პოზიტიური დამოკიდებულება უკვე არსებობს. აღსანიშნავია, რომ რუსულ ვაქცინას თავდაპირველად ეჭვის თვალით უყურებდნენ, მაგრამ მოგვიანებით „სპუტნიკმა“ ავტორიტეტული სამედიცინო ჟურნალის The Lancet-ს მიერ მაღალი შეფასება დაიმსახურა.

 

ევროკომისიის პრეს-მდივანმა ამას წინათ ხაზი გაუსვა, რომ ევროკავშირის წევრ-ქვეყნებს არავინ არ უშლის მოლაპარაკება დაიწყონ ან ხელშეკრულება გააფორმონ [მათთვის სასურველ] ფარმაცევტულ კომპანიებთანო.

 

პირველი მერცხლები: უნგრეთი, სლოვაკეთი და ჩეხეთი

 

უნგრეთი პირველი ევროპული სახელმწიფო გახდა, რომელმაც თავისი მოსახლეობის რუსული ვაქცინით აცრები დაუშვა. რამდენიმე კვირის შემდეგ ბუდაპეშტმა განაცხადა, რომ ასევე ნებას რთავს ჩინური ვაქცინით აცრების დაწყებას, პრემიერ-მინისტრი ვიქტორ ორბანი სწორედ ჩინური ვაქცინით აიცრა.

 

„ჩვენ რომ რუსული და ჩინური ვაქცინა არ გვეყიდა, ძალიან დიდი პრობლემები გვექნებოდა“, - განაცხადა მან ერთი კვირის წინ და ხაზი გაუსვა, რომ უნგრეთმა უკვე დაუკვეთა ჩინეთს Sinopharm-ის მიერ წარმოებული ვაქცინის ხუთი მილიონი დოზა.

 

უნგრეთს ევროკავშირის წევრმა სხვა ქვეყნებმაც მიბაძეს: სლოვაკეთმა „სპუტნიკის“ პირველი პარტია ახლახან, ორ მარტს მიიღო. ქვეყნის პრემიერმა იგორ მატოვიჩმა განაცხადა, რომ სლოვაკეთი რუსეთისაგან კიდევ ორ მილიონ დოზას მიიღებს მარტ-აპრილში და მაის-ივნისში. მეზობელი ჩეხეთი თავის რიგს ელოდება: 28 თებერვალს პრეზიდენტმა მილოშ ზემანმა განაცხადა, „სპუტნიკის“ მიწოდება უახლოეს დღეებში დაიწყება. ჩეხეთს განზრახული აქვს ჩინური ვაქცინის შეძენაც.

 

„რუსული ვაქცინის შეძენა სურს მსოფლიოს 65 სახელმწიფოს, მათ შორის ევროკავშირის წევრ ექვს ქვეყანას. მაშ რატომღა გაჰყვირიან - „ღმერთო, ეს ხომ საშინელებაა!“, - განაცხადა ჩეხეთის პრემიერ-მინისტრმა ანდრეი ბაბიჩმა, - დამიჯერეთ, ხალხო, სულ მალე ევროკავშირის სხვა წევრებიც რუსებს თხოვნას გაუგზავნიან „სპუტნიკის“ შესაძენად“.

 

ავსტრია და პოლონეთი ფიქრობენ და მოქმედებენ...

 

ამას წინათ ავსტრიის მთავრობამ განაცხადა, რომ რუსეთთან მოლაპარაკებას აწარმოებს ვაქცინის შეკვეთის მიზნით და პარალელურად არ გამორიცხავს, რომ იგივე მიზნით ჩინეთსაც მიმართოს.

 

პოლონეთის პრეზიდენტი ანჯეი დუდა პირველ მარტს ჩინეთის ლიდერს დაუკავშირდა და ვაქცინის ყიდვის შესახებ ესაუბრა. ამის შესახებ გაზეთი „პოლიტიკო“ იტყობინება. მისი ინფორმაციით, ჩინეთმა მზადყოფნა გამოხატა სწრაფად უზრუნველყოს თხოვნის შესრულება: „ჩინეთი მზად არის პოლონეთს ანტიკოვიდური ვაქცინა მიაწოდოს ქვეყნის მოთხოვნილების მიხედვით“, - ნათქვამია ჩინეთის საგარეო საქმეთა სამინისტროს პრეს-რელიზში.

 

ავსტრიამ ასევე განაცხადა, რომ სამომავლოდ დაგეგმილია თანამშრომლობა დანიასთან და ისრაელთან: „ჩვენ უკეთ უნდა მოვემზადოთ კორონავირუსის ახალი მუტაციების წინააღმდეგ და უნდა ვეცადოთ, რომ სამომავლოდ მეორე თაობის ვაქცინის შესაძენად მხოლოდ ევროკავშირზე არ ვიყოთ დამოკიდებული“, - განაცხადა ავსტრიის კანცლერმა სებასტიან კურცმა. მან ასევე ხაზი გაუსვა, რომ მთლიანობაში ბრიუსელის მიდგომა „პრინციპში სწორია“, მაგრამ მაინც საყვედური გამოხატა ევროკავშირის არააქტიური ანტიკოვიდური ძალისხმევის გამო: „სამკურნალო საშუალებების ევროპული სააგენტო ძალიან ნელა მუშაობს და დიდ დროს ანდომებს ვაქცინების შემოწმებას, ფარმაცევტულ კომპანიებს კი ბევრი „ვიწრო ადგილები“ აქვთ“, - აღნიშნულია ავსტრიის მთავრობის პრეს-რელიზში.

 

ოთხ მარტს სებასტიან კურცი დანიელ კოლეგა მეთ ფრედერიკსენთან ერთად ისრაელში გაემგზავრა ბენიამინ ნეთანიაჰუსთან შესახვედრად, ვაქცინების ერთობლივად შექმნასა და წარმოებაში უპრეცედენტო თანამშრომლობის მიზნით.

 

წყარო: https://www.lefigaro.fr/international/vaccins-face-aux-retards-plusieurs-pays-de-l-ue-se-tournent-vers-la-chine-et-la-russie-20210303

 

მოამზადა სიმონ კილაძემ

წაკითხვა 136 ჯერ
ჩვენს შესახებ

მოკლე ინფო

ჩვენი მთავარი პრინციპებია: სიზუსტე, ოპერატიულბა და დაბალანსებული ინფორმაციის მიწოდება.

ჩვენს შესახებ

საინფორმაციო სააგენტო „პირველი ნიუსი“ 2018 წელს შეიქმნა. ჩვენი სააგენტოს ვებგვერდზე ქვეყნდება მიმდინარე პოლიტიკური, ეკონომიკური, სოციალური, მსოფლიო, კულტურული, სპორტული და სხვა აქტუალური სიახლეები.  სიტყვისა და გამოხატვის თავისუფლება ადამიანის ერთ–ერთი ძირითადი უფლებაა. სწორედ ამ უფლების გამოყენებით ჩვენმა გუნდმა აიღო ვალდებულება, რომ საზოგადოებას დროულად მივაწოდოთ ამომწურავი, ობიექტური ინფორმაცია ფაქტებისა და მოვლენების დამახინჯების გარეშე.