ქობულეთში ბიოლოგიურ იარაღზე მუშაობდნენ...
"მოწინააღმდეგის სასოფლო-სამეურნეო სავარგულებზე ქობულეთში გამოკვლეული საბრძოლო ჰერბიციდების გაფრქვევა საბჭოთა გენერლებს ისევე ჰქონდათ ჩაფიქრებული, როგორც ამას ამერიკელები ვიეტნამის ჯუნგლებში აკეთებდნენ"
ნატოს ქვეყნებში მცენარეთა დასაავადებლად და მოსავლის გასანადგურებლად განკუთვნილი ბიოლოგიური იარაღის ნიმუშებზე საიდუმლო ექსპერიმენტები ქობულეთში ათწლეულების განმავლობაში მიმდინარეობდა.
ხრუშჩოვის ბრძანებით 1958 წელს გახსნილი ინსტიტუტებიდან ერთ-ერთის ქობულეთის ფილიალში იმ ჰერბიციდებზეც მუშაობდნენ, რომლებსაც მთავარი მოწინააღმდეგის - აშშ-ის კარტოფილის მოსავალი მთლიანად უნდა გაენადგურებინა...
1956 წლის 9 მარტს საბჭოთა ხელისუფლებამ ნიკიტა ხრუშჩოვის ბრძანებით დახვრიტა და სისხლში ჩაახშო თბილისში, რუსთაველის პროსპექტზე გამართული მიტინგი, რომლის მონაწილეები კრემლის ახალი ხელმძღვანელობის მიერ სტალინის კრიტიკას აპროტესტებდნენ. ამ ტრაგიკულ მოვლენამდე ცოტა ხნით ადრე, 1956 წლის 15 თებერვალს, საბჭოთა კავშირის მინისტრთა საბჭომ მიიღო გასაიდუმლოებული გადაწყვეტილება, დაეჩქარებინა კვლევითი მუშაობა იმ ბიოლოგიური ნივთიერებების შესაქმნელად, რომლებსაც გამოიყენებდნენ სავარაუდო მოწინააღმდეგის სასოფლო-სამეურნეო მოსავლისა და შინაური ცხოველების დასაინფიცირებლად და გასანადგურებლად, რაც მას დიდ ეკონომიკურ ზიანს მოუტანდა და მის საბრძოლო პოტენციალს შეასუსტებდა.
იმ დროს პირველი "ცივი ომი" ზენიტში იყო და ბიოლოგიური იარაღის შექმნაში საბჭოთა კავშირს არც მისი მთავარი სავარაუდო მოწინააღმდეგე - აშშ ჩამორჩებოდა. 1963-67 წლებში პენტაგონმა ვიეტნამის ჯუნგლებს თვითმფრინავებიდან (რისთვისაც, ძირითადად, ჩვენი თანამემამულის, მიხეილ გრიგორაშვილის მიერ კონსტრუირებულ სამხედრო-სატრანსპორტო თვითმფრინავს - C-123 Provider-ს იყენებდნენ) 72 მლნ ლიტრამდე დეფოლიანტი დაასხა, რათა ხეებს ფოთლები ჩამოსცვენოდა და ჯუნგლებში ჩამალულ ვიეტნამელ კომუნისტთა შეირაღებული რაზმების აღმოჩენა გაადვილებულიყო.
თუკი ამერიკელმა სამხედროებმა საზოგადოების ზეწოლის გამო თითქმის შეწყვიტეს ბიოლოგიურ იარაღზე მუშაობა, 1970-იანი წლებიდან საბჭოთა კავშირი, პირიქით, ბიოლოგიური საბრძოლო ჰერბიციდებისა თუ ვირუსების შექმნა-წარმოების საქმეში მსოფლიოს უპირველესი ქვეყანა გახდა.
ძნელი სათქმელია, კონკრეტულად რა სამეცნიერო-კვლევითი მუშაობა მიმდინარეობდა ფიტოპათოლოგიის ინსტიტუტის ქობულეთის ფილიალში, მაგრამ ცხადია, რომ სასოფლო-სამეურნეო მცენარეთა საბრძოლო ჰერბიციდებით განადგურების საბჭოთა საიდუმლო პროგრამის განხორციელებაში ქობულეთის ლაბორატორიებში წლების განმავლობაში მიმდინარე კვლევებმა თავისი წვლილი შეიტანა.
სიახლეები
- მაკარონი მდნარი ყველით
- " როგორ შეიძლება მოწოდებები გააკეთო დაპირისპირებაზე? „ოცნება“ ხომ არ ხარ? - ყველას მოვუწოდებ, თავი შეიკავონ მსგავსი ტიპის უპასუხისმგებლო განცხადებებისგან "-ბექა ლილუაშვილი გიორგი ვაშაძის განცხადებაზე
- 3 თვის მონაცემებით, საქართველოში თავშესაფრის მაძიებლად 379 პირია აღრიცხული, საიდანაც ყველაზე ბევრი - 66 ადამიანი, უკრაინის მოქალაქეა - ამავე პერიოდში საქართველოდან სხვა ქვეყნის 59 მოქალაქე გააძევეს
- " ევროპარლამენტში საქართველოსათვის სანქციების მოთხოვნის მხარდამჭერთა ბირთვს ლიეტუველი დეპუტატები წარმოადგენენ, კუბილიუსის - გორბაჩოვის მხარდამჭერისა და მეხოტბის მეთაურობით" - გია ვოლსკი
- "მამული, ენა და სარწმუნოება - ეს არის სამი მთავარი საყრდენი, რომელიც ქმნის საქართველოს ეროვნულ იდენტობას" - ირაკლი კობახიძე