ივერი მელაშვილი და ნატალია ილიჩოვა გირაოს სანაცვლოდ გათავისუფლდნენ

დავით გარეჯის საქმეზე ბრალდებულები ივერი მელაშვილი და ნატალია ილიჩოვა გირაოს სანაცვლოდ გათავისუფლდნენ. გადაწყვეტილება მოსამართლემ ცოტა ხნის წინ გამოაცხადა. გირაოს ოდენობა თითოეულისთვის 20 000 ლარს შეადგენს.

ბრალდების მხარე 30 000-ლარიან გირაოს ითხოვდა, თუმცა, მოსამართლემ შუამდგომლობა ცვლილებებით დააკმაყოფილა.

 

ამასთან, სასამართლომ დააკმაყოფილა ბრალდების მხარის შუამდგომლობა ბრალდებულების დაკავებულების თანამდებობიდან გადაყენების შესახებ.

 

„სასამართლო თვლის, რომ თანამდებობაზე ყოფნა არ არის დაკავშირებული მხოლოდ ანაზღაურებასთან. სასამართლო თვლის, რომ არსებობს საფრთხე, რადგან თანამდებობა, რომელსაც იკავებდა ივერი მელაშვილი შეჩერებამდე, პირდაპირ არის კავშირში საქმეში არსებულ ინფორმაციებთან. უნდა დაკმაყოფილდეს შუამდგომლობა გადაყენებასთან დაკავშირებით. სასამართლო თვლის, რომ პირადი თავდებობის საკითხზე, რაც კანონმდებელმა დაადგინა წერილობით, არაა წარმოდგენილი, თუმცა შეიძლება, ამ პირთა სასართლოსი წარმოდგენა, თუმცა პირადი თავდებობა არ გამომდინარეობს საჯარო ნაცნობობიდან და ასეთი თავდებობა საკმარისი არ აღმოჩნდებოდა“, – განაცხადა მოსამართლე ლელა კალიჩენკომ.

 

მელაშვილისა და ილიჩოვასთვის აღკვეთის ღონისძიების შეცვლის შუამდგომლობით სასამართლოს პროკურატურამ მიმართა. ბრალდების მხარემ ასევე მოითხოვა, ბრალდებულებს აეკრძალოთ სახელმწიფო საზღვრის გადაკვეთა პროკურატურის ინფორმირების გარეშე და გადაყენებულნი იქნენ თანამდებობებიდან, რომლებსაც იკავებდნენ. სამსახურიდან გათავისუფლების შესახებ პროკურატურის მოთხოვნაზე უკმაყოფილება გამოთქვა ბრალდებულმა ივერი მელაშვილმა.

 

ამასთან, დღევანდელ პროცესზე დაკავებულებმა კიდევ ერთხელ აღნიშნეს, რომ ბრალს არ აღიარებენ.

 

რაც შეეხება დაცვის მხარეს, ადვოკატები ბრალდებულების გირაოს გარეშე, რამდენიმე პირის თავდებობის საფუძველზე გათავისუფლებას ითხოვდნენ. ადვოკატებმა თავმდებ პირებს შორის დაასახელეს ბათუ ქუთელია, ნინო გოგუაძე, ელენე ხოშტარია, ხატია დეკანოიძე და საბა ბუაძე.

 

სასამართლო სხდომის პარალელურად, თბილისის საქალაქო სასამართლოსთან აქცია მიმდინარეობდა. ადგილზე მოქალაქეები, ასევე სხვადასხვა პოლიტიკური პარტიის წარმომადგენლები იყვნენ შეკრებილნი.

 

დავით გარეჯის საქმეზე პროკურატურამ საგარეო საქმეთა სამინისტროს თანამშრომელი ივერი მელაშვილი და შს სამინისტროს თანამშრომელი ნატალია ილიჩოვა 7 ოქტომბერს დააკავა. მათ ბრალად ედებათ საქართველოს ტერიტორიების წინააღმდეგ მიმართული ქმედება. თბილისის საქალაქო სასამართლომ მათ აღკვეთის ღონისძიების სახით პატიმრობა შეუფარდა. დაკავებულები მათთვის წარდგენილ ბრალს არ აღიარებენ. თბილისის საქალაქო სასამართლომ დაკავებულების მიმართ აღკვეთის ღონისძიების სახით შეფარდებული პატიმრობა 30 ნოემბერს გადასინჯა და ბრალდებულები პატიმრობაში დატოვა.

 

პროკურატურამ მიერ 21 იანვარს საქმეზე ფარული ჩანაწერი გამოაქვეყნა. როგორც პროკურატურაში აცხადებენ, ჩანაწერის მიხედვით, ივერი მელაშვილი და ნატალია ილიჩოვა საზღვრის დელიმიტაცია-დემარკაციის პროცესში ზემდგომი თანამდებობის პირების დავალებით მოქმედებდნენ.

წაკითხვა 116 ჯერ
ჩვენს შესახებ

მოკლე ინფო

ჩვენი მთავარი პრინციპებია: სიზუსტე, ოპერატიულბა და დაბალანსებული ინფორმაციის მიწოდება.

ჩვენს შესახებ

საინფორმაციო სააგენტო „პირველი ნიუსი“ 2018 წელს შეიქმნა. ჩვენი სააგენტოს ვებგვერდზე ქვეყნდება მიმდინარე პოლიტიკური, ეკონომიკური, სოციალური, მსოფლიო, კულტურული, სპორტული და სხვა აქტუალური სიახლეები.  სიტყვისა და გამოხატვის თავისუფლება ადამიანის ერთ–ერთი ძირითადი უფლებაა. სწორედ ამ უფლების გამოყენებით ჩვენმა გუნდმა აიღო ვალდებულება, რომ საზოგადოებას დროულად მივაწოდოთ ამომწურავი, ობიექტური ინფორმაცია ფაქტებისა და მოვლენების დამახინჯების გარეშე.