რუსეთის ჯარებმა მორიგი მასირებული შეტევა მიიტანეს უკრაინის დედაქალაქ კიევზე. 21 ოქტომბრის ღამიდან კიევში რამდენჯერმე გამოცხადდა საჰაერო განგაში ბალისტიკური რაკეტებითა და დრონებით თავდასხმის გამო.
კიევის მერის და საქალაქო-სამხედრო ადმინისტრაციის მონაცემებით, დაზიანებულია სახლები და სასწრაფო სამედიცინო დახმარების სამსახურის ერთ-ერთი სადგური. ხანძარი გაჩნდა რესტორნის შენობაში. კიევის სამხრეთის ხიდზე დაზიანებულია მეტროს ინფრასტრუქტურა.
22 ოქტომბერს დილით უკრაინის საგანგებო სიტუაციების სამსახურმა განაცხადა, რომ კიევში დაიღუპა ერთი და დაშავდა 22 ადამიანი. დაშავებულებს შორის ოთხი ბავშვია.
რუსული ბალისტიკური რაკეტებით შეტევამ ხანძრები და ნგრევა გამოიწვია კიევის ექვს რაიონში, სადაც დაზიანებული, ან დამწვარია სახლები და არასაცხოვრებელი შენობები. უკრაინის საგანგებო სიტუაციების სამსახურმა არასაცხოვრებელი შენობებიდან კონკრეტულად მხოლოდ ერთი, კიევის სვიატოშინსკის რაიონში მდებარე სარესტორნე კომპლექსი დაასახელა.
რუსეთის თავდაცვის სამინისტრომ 22 ოქტომბერს დილით ოფიციალური არხებით გაავრცელა ცნობა, რომ კიევში რაკეტებით და დრონებით დაარტყეს სამ საწარმოს, სადაც უპილოტო საფრენ აპარატებს და რაკეტებს აწარმოებენ, დრონების საწყობს და სამხრეთის ხიდს, რომელიც სამხედრო ტვირთების ტრანზიტისთვის გამოიყენება.
სამხედრო დანიშნულების საწარმოებზე შეტევა სხვა წყაროებით დადასტურებული არ არის.
რუსეთის თავდაცვის სამინისტრო, როგორც წესი, არაფერს ამბობს სამოქალაქო ობიექტების ნგრევასა და მსხვერპლზე მშვიდობიან მოსახლეობაში.
