პარლამენტის დიასპორის კომიტეტის თავმჯდომარემ, ირაკლი ზარქუამ „ღამის კურიერის“ ეთერში, საქართველოში ოპოზიციური პარტიების აკრძალვის საკითხზე ისაუბრა.
როგორც მან აღნიშნა, მმართველი გუნდის მხრიდან საკონსტიტუციო სარჩელის შეტანა ოპოზიციისადმი შიშს არ უკავშირდება. ზარქუას თქმით, საერთაშორისო ორგანიზაცია IRI-ს კვლევების თანახმად, ოპოზიციურ პარტიებს ჯამურად რეიტინგის მხოლოდ 16% აქვთ, ხოლო მათი მხარდამჭერები აქციებზე მცირე რაოდენობით გამოდიან, რის გამოც ისინი „ქართული ოცნებისთვის“ პოლიტიკურ საფრთხესა და კონკურენტს არ წარმოადგენენ.
„ჩვენ საკონსტიტუციო სარჩელი იმიტომ კი არ შეგვიტანია, რომ ამათი გვეშინია. აგერ IRI-მ, მათმა მხარდამჭერმა საერთაშორისო ორგანიზაციამ ამათ წერტილი დასვა. 1%-იანები არიან, ჯამში 16%. შეიძლება ეგეც გაზრდილია. მორჩა, დამთავრდა აქ. ესენი პოლიტიკურად ჩვენთვის საფრთხეს არ წარმოადგენენ. ჩვენ უბრალოდ ვთქვით, რომ ის დაკვეთა, რაც ჰქონდათ ქართველ, ჩვენს ამომრჩევლებს, რომ გასამართლდეს რეჟიმი და აეკრძალოს ფაშისტურ ორგანიზაციის საქმიანობა, ამაზეა საუბარი. თორემ რა საფრთხეს წარმოადგენენ ესენი? – ერთმანეთისთვის არიან საფრთხე და მძევლები არიან ერთმანეთის, უკვე ხომ ნახეთ, აბა ერთმანეთს როგორ დაერივნენ და რა სიტყვებით ამკობენ.
რას ამბობთ, ყველაზე კარგი დემონსტრირება რა იყო? – IRI-ს კვლევებთან ერთად, სადაც ჯამურად ამათ აქვთ 16%, აგერ თითქოს განახლებული „ნაცმოძრაობა“ რაღაც სიგიჟეები რომ მოიგონეს და აი ბელადის სადიდებლად პარკში რომ შეიკრიბნენ და დავითვალეთ, 77 კაცი იყო. 77 კაცზე მეტი არ გამოვიდა მხარდამჭერი აქციაზე. დამთავრდა ამით. დამთავრდა თემა. ჩვენთვის ესენი არ წარმოადგენენ რამე საფრთხეს პოლიტიკურს და კონკურენტს, რა სისულელეა. აქ უბრალოდ საუბარია იმაზე, რომ ის ფაშისტური მიდგომები, რაც ჰქონდათ, ხელწერა, თქვენ გგონიათ დაავიწყდათ რომელიმეს? იგივე ხელწერა აქვთ, იგივე მიდგომა აქვთ, იგივე, აბა, დააკვირდით ეთერებში როგორ ემუქრებიან ჩვენ, ჩვენს მხარდამჭერებს, იგივე ნარატივი აქვთ, არ შეცვლილან“, – განაცხადა ირაკლი ზარქუამ.
