,,ახალგაზრდებში მოხალისეობის იდეის პოპულარიზების პროგრამის" დასკვნით ღონისძიებაზე ქუთაისში მოქმედმა არასამთავრობო ორგანიზაციებმა ახალგაზრდებს თავიანთი პროექტები და პროგრამები წარუდგინეს. დაინტერესების შემთხვევაში ახალგაზრდებს საშუალება ჰქონდათ დარეგისტრირებულიყვნენ მათთვის სასურველ ორგანიზაციაში ან ორგანიზაციებში მოხალისედ ან მიეღოთ მონაწილეობა სასურველ პროექტებში. ფორუმში მონაწილეობა 10-ზე მეტმა არასამთავრობო ორგანიზაციამ მიიღო.

"დღეს, აკაკი წერეთლის სახელმწიფო უნივერსიტეტში გაიმართა მოხალისეობრივი ფორუმი. ფორუმი ტარდებოდა ქ. ქუთაისის მუნიციპალიტეტის მერიის ახალგაზრდული ინიციატივის ფარგლებში. პროექტის მთავარი მიზანი გახლდათ მოხალისეობის იდეის პოპულარიზება ქუთაისში მცხოვრები ახალგაზრდებისათვის. ჩვენს დღევანდელ ფორუმს სამი ძირითადი მიმართულება ჰქონდა: პირველი - აუდიტორიისათვის გაგვეცნო პროექტისა და განხორციელებული აქტივობების შესახებ, მიღწეული მიზნებისა და შედეგების შესახებ. მეორე და მნიშვნელოვანი გახლდათ, რომ ჩვენს ფორუმზე განვიხილეთ ადგილობრივ და ცენტრალურ დონეზე მოხალისეობის მიმართულებით განხორციელებული ცვლილებები, ხოლო მესამე და მთავარი შემადგენელი ნაწილი გახლდათ გამოფენა. დაახლოებით ათმა ადგილობრივმა ორგანიზაციამ მიიღო მონაწილეობა. მათ ახალგაზრდებს საკუთარი პროგრამების შესახებ ინფორმაცია მიაწოდეს.

ეს ფორუმები მნიშვნელოვანია ადგილობრივ დონეზე, რადგან მოხდეს ახალგაზრდების გააქტიურება და მათი ჩართვა გადაწყვეტილების ჩართვის პროცესში,"- განაცხადა FirstNews.ge - თან საუბარში ,,თაობათა დიალოგის’’ გენერალურმა მდივანმა ლანა თოთაძემ.

"️დღევანდელი მოხალისეობის ფორუმი ძალიან კარგი მაგალითია იმისა, თუ როგორ წარმატებულად მიმდინარეობს ადგილობრივი თვითმმართველობის მიერ დაფინანსებული "ახალგაზრდული ინიციატივების მხარდამჭერი პროგრამა“.

არასამთავრობო ორგანიზაციის „თაობათა დიალოგის“ ეს პროექტი არის ერთ-ერთი, რომელიც გასულ წელს დაფინანსდა. ფორუმზე გამოიკვეთა, თუ როგორი დაინტერესებაა ახალგაზრდებში მოხალისეობის მიმართ. განვითარებულ საზოგადოებაში მოხალისეობას დიდი მნიშვნელობა ენიჭება. 

დღევანდელი ფორუმი ხელს შეუწყობს  ჩვენი ახალგაზრდების ინფორმირებულობას და კიდევ უფრო მეტი მოხალისის  ჩართვას აქტიურ საზოგადოებრივ ცხოვრებაში.“- განაცხადა იოსებ ხახალეიშვილმა.