May 2, 2024

"ყოველთვის ვმადლობდეთ უფალს და გვეგალობოს ოსანა მისთვის, ვმადლობდეთ მას, რომ შედის იერუსალიმში, რათა გამოგვიხსნას ჩვენ მარადიული სიკვდილისგან"

ყოველთვის ვმადლობდეთ უფალს და გვეგალობოს ოსანა მისთვის. ვმადლობდეთ მას, რომ იგი შედის იერუსალიმში, რათა გამოგვიხსნას ჩვენ მარადიული სიკვდილისგან, დიდება და მადლობა მას თავისი წმინდა სისხლის დაღვრისთვის, – ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი) დღევანდელი ქადაგებისას განაცხადა.

მეუფე შიომ მრევლს ბზობის დღესასწაული მიულოცა.

 

„გილოცავთ დღევანდელ დღესასწაულს. დღეს გახლავთ დიდებით შესვლა უფლისა ჩვენისა იესო ქრისტესი იერუსალიმში. როგორც სახარებაშია აღნიშნული, მთელი ქალაქი შეიძრა ამ მოვლენისგან, მთელი ქალაქი მიისწრაფვოდა უფალ იესო ქრისტესთან შესახვედრად, მიმართავდნენ მას სახოტბო შეძახილით, ოსანა მაღალთა შინა. როგორც ხელმწიფეს, ისე ხვდებოდნენ მას, რაღაც საოცარი გამონათება იყო მთელ იერუსალიმში, თითქოს ყველამ სცნო იგი, როგორც მეუფე, როგორც მესია, როგორც სასწაულმოქმედი.

 

შეიძლება, ვთქვათ, რომ ჩვენც გვაქვს ხოლმე ასეთი გამონათებები, გამონათებები, როდესაც ადამიანისთვის ცხადი ხდება ღმერთის არსებობა, ცხადი ხდება, რომ იესო ქრისტე არის მესია, რომ მისი სახარება არის ჭეშმარიტება. სულ რამდენიმე დღეში კი იგივე ხალხი მოითხოვს იესო ქრისტეს ჯვარცმას და სიკვდილით დასჯას. სამწუხაროდ, ჩვენ გვაფიქრებს ეს მოვლენა ადამიანის ცხოვრებაში ჩვენს ცვალებადობაზე, ჩვენს თავშიც შეგვიმჩნევია ეს. ადამიანები თავიანთი ცოდვებით, თავიანთი ვნებებით კვლავ ითხოვენ ქრისტეს ჯვარცმას და დასჯას.

 

რა თქმა უნდა, უფალმა იესო ქრისტემ ეს იცოდა და ამიტომაც არის, რომ როდესაც იგი უახლოვდება იერუსალიმს, ის ტირის. მტირალი შედის მეფე ისრაელისა იერუსალიმში, ის გლოვობს, ის მწუხარეა, ვინაიდან მან წინასწარ უწყის, რა ელოდება იერუსალიმს მისი უარყოფისთვის. მიუხედვად ამისა, უფალი იესო ქრისტე ვერ დატოვებდა თავის რჩეულ ერს, რომელთა მცირე ნაწილმა იმჟამად მიიღო იესო ქრისტე, რომელიც გახდა შემდგომში ქრისტიანეთა მოდგმის ფუძემდებელი. ღმერთმა დაგლოცოთ და გაგაძლიეროთ, გაგახაროთ, ღმერთმა მოგვცეს ჩვენ მადლი, რომ ყიველთვის გვახსოვდეს უფლისა ჩვენისა იესო ქრისეტს სიტყვები  – „დღევანდელ დღეს მაინც გცოდნოდა, რა მოგანიჭებს მშვიდობას“.

 

უფალი ჩვენც მოგვხედავს სხვადასხვა გზით, ეს შეიძლება, იყოს დიდი სიხარული, ან პირიქით, მწუხარება, დიდი წარმატება ან წარუმატებლიბა და ა.შ. ამ ფორმით ვიხილავთ ჩვენ უფალს და თუ ჩვენ მას უარს ვეტყვით, თუ ჩვენ უგულვებელვყობთ, მაშინ იტირებს ჩვენი მფარველი ანგელოზი.

 

ღმერთმა დაგლოცოთ, გაგახაროთ, გაგაძლიეროთ, ყოველთვის მადლობდეთ უფალს და გვეგალობოს ოსანა მისთვის. უნდა ვმადლობდეთ იმისთვის, რომ ის შედის იერუსალიმში, რათა გამოგვიხსნას ჩვენ მარადიული სიკვდილისგან, დიდება და მადლობა მას მისი წმინდა სისხლის დაღვრისთვის“, – განაცხადა მეუფე შიომ.

წაკითხვა 402 ჯერ
ჩვენს შესახებ

მოკლე ინფო

ჩვენი მთავარი პრინციპებია: სიზუსტე, ოპერატიულბა და დაბალანსებული ინფორმაციის მიწოდება.

ჩვენს შესახებ

საინფორმაციო სააგენტო „პირველი ნიუსი“ 2018 წელს შეიქმნა. ჩვენი სააგენტოს ვებგვერდზე ქვეყნდება მიმდინარე პოლიტიკური, ეკონომიკური, სოციალური, მსოფლიო, კულტურული, სპორტული და სხვა აქტუალური სიახლეები.  სიტყვისა და გამოხატვის თავისუფლება ადამიანის ერთ–ერთი ძირითადი უფლებაა. სწორედ ამ უფლების გამოყენებით ჩვენმა გუნდმა აიღო ვალდებულება, რომ საზოგადოებას დროულად მივაწოდოთ ამომწურავი, ობიექტური ინფორმაცია ფაქტებისა და მოვლენების დამახინჯების გარეშე.