პროექტს, რომლის მიზანია აფხაზეთიდან იძულებით გადაადგილებულ პირთა განსახლების ობიექტებში საერთო ქონების მართვის თანამედროვე სტანდარტების დამკვიდრება და დევნილთა საზოგადოებრივი ინტეგრაციის გაზრდა, ცენტრი „აფხაზეთი“ აფხაზეთის ავტონომიური რესპუბლიკის აფხაზეთის ავტონომიური რესპუბლიკიდან იძულებით გადაადგილებულ პირთა-დევნილთა სამინისტროს მხარდაჭერით ახორციელებს.

პროექტის ფარგლებში, განხორციელდა შემდეგი აქტივობები:

1. აფხაზეთიდან იძულებით გადაადგილებული პირების - დევნილების განსახლების ობიექტებში ხელი შეეწყო ბინათმესაკუთრთა ამხანაგობების ჩამოყალიბებას, ნოტარიულ რეგისტრაციას და მუნიციპალურ აღრიცხვას;

2. ბინათმესაკუთრეთა ამხანაგობების წარმომადგენლების შესაძლებლობები გაიზარდა ტრენინგების მეშვეობით;

3. სამიზნე ბინათმესაკუთრეთა ამხანაგობებს გაეწიათ იურიდიული კონსულტაციები;

4. შეიქმნა დევნილთა ბინათმესაკუთრეთა ამხანაგობების ვებ -პლატფორმა;

5. ხელი შეეწყო დევნილთა ბინათმესაკუთრეთა ამხანაგობების ქსელის ჩამოყალიბებას;

მრგვალი მაგიდის დისკუსია წარიმართა თემაზე „აფხაზეთიდან დევნილ თემში ბინათმესაკუთრეთა ამხანაგობების მდგრადი მართვის ხელშეწყობის საკითხები" — პროექტის მიგნებების და შედეგების განხილვა. 

დისკუსიის მიმდინარეობისას, განხილული იქნა პროექტის ფარგლებში მიღებული გამოცდილება, რაც აქტუალურია დევნილთა განსახლების ობიექტებში საერთო ქონების მართვის საუკეთესო პრაქტიკის დანერგვის, დევნილთა საზოგადოებრივი  ინტეგრაციისა და ადგილობრივი წარმომადგენლობის გაზრდისათვის.

ღონისძიების დამსწრეები ასევე გაეცვნენ პროექტის ფარგლებში შემუშავებულ ვებ-პლატფორმას და დევნილთა ბინათმესაკუთრეთა ამხანაგობების ქსელის მიზნებს. განხილულ იქნა დევნილთა გრძელვადიანი საცხოვრებლით უზრუნველყოფის მიმდინარე აქტუალური საკითხები. 

აღნიშნული პროექტის შესახებ უფრო დეტალურად FirstNews.ge- თან ცენტრი "აფხაზეთის" დირექტორმა ნუკრი მილორავამ ისაუბრა.

„ძალიან მნიშვნელოვანია სათემო ორგანიზაციებისა და ზოგადად თემის განვითარება.

თემი და სათემო ორგანიზაციები სახელმწიფოებრივი მენეჯმენტის მართვის ერთ-ერთი მნიშვნელოვანი და პირველადი უჯრედია, რომელიც თვითორგანიზებას აკეთებს. თვითორგანიზება ნიშნავს : პრობლემების იდენტიფიცირებას, ამ პრობლემების მოგვარების გზების დასახვას, შემდგომ უკვე ამ გზების ღონისძიებების რეალიზაციას იმისთვის, რომ კონკრეტულ შედეგს მივაღწიოთ.

შედეგი ყოველთვის ხელშესახები უნდა იყოს, შესაბამისად პრობლემაც ისეთი უნდა მოვძებნოთ, რომლის რეალური გადაჭრის რესურსებიც ჩვენ დღეს გაგვაჩნია. ჩვენმა პროექტმა. დევნილთა დასახლებებში მცხოვრებ, 50-ზე მეტ სათემო ორგანიზაციებს პრობლემების იდენტიფიცირება ასწავლა, ასევე, პრობლემების ირგვლივ ორგანიზება და მათი გადაჭრის გზების მოძებნა.

ეს კი ჩართულობის თემისა და ადგილობრივი თვითმმართველობის დახმარებით კეთდება.

ძალიან მალე, ალბათ დევნილებიც საზოგადოების სრულუფლებიანი წევრები და ჩვენი საზოგადოების ინტეგრირებული ნაწილები უნდა გახდნენ. მათ უნდა მიიღონ მონაწილეობა როგორც ადგილობრივ ასევე ცენტრალური ხელისუფლების სოციალური, ეკონომიური და პოლიტიკური ფუნქციების განხორციელებაში. სწორედ ეს არის ამ პროექტის მთავარი მიზანი,“- განაცხადა ჩვენთან საუბარში ნუკრი მილორავამ.

ქსელის თავმჯდომარის რუსუდან ჯეჯეიას თქმით, ამ პროექტის ფარგლებში დასავლეთის სხვადასხვა რეგიონში ცენტრი "აფხაზეთის" ხელშეწყობით რამდენიმე ბინათმესკუთრეთა ამხანაგობა შეიქმნა.

„პროექტი მოიცავს წევრთა საერთო ქონების საზღვრების დადგენას, ეფექტურ მართვას, მუნიციპალურ პროგრამებში მონაწილეობას, შესაძლებლობების გაზრდასა და ასე შემდეგ. ასევე, შეიქმნა საიტი, სადაც ამხანაგობები შეძლებენ გაიგონ სიახლეები და განათავსონ საკუთარი საუკეთესო წარმატებული პრაქტიკული მაგალითები.

პროექტი ასევე, ხელს უწყობს ახალი და უკვე გამოცდილი ამხანაგობების დამეგობრებასა და გამოცდილების გაზიარებას,"- განაცხადა რუსუდან ჯეჯეიამ.

დისკუსიაში მონაწილეობას იღებდნენ სამოქალაქო საზოგადოების ორგანიზაციები, ადგილობრივი თვითმმართველობის, აფხაზეთიდან დევნილი თემისა და მედიის წარმომადგენლები.