დარბევის შედეგად 21 ადამიანი დაიღუპა, ხოლო ასობით მოქალაქე დაუდგენელი შემადგენლობის გაზით მოიწამლა.

მოგვიანებით, 1991 წლის 9 აპრილს კი უზენაესმა საბჭომ საქართველოს სახელმწიფოებრივი დამოუკიდებლობის აღდგენა გამოაცხადა.

9 აპრილი საქართველოს უახლეს ისტორიაში ჩაეწერა ტრაგედიის და, ამავდროულად, საქართველოს დამოუკიდებლობის აღდგენის დღედ.

მაკა ბელქანია FirstNews.ge- თან 9 აპრილის მოვლენებს იხსენებს. მან თავის აფხაზური მოგონებების კრებულში შეიტანა ეროვნული მოძრაობის დაწყება აფხაზეთში, სადაც დაწვრილებით აღწერს 9 აპრილის ტრაგედიას.

"1989 წელს სკოლას ვამთავრებდი და ბუნებრივია სამომავლო გეგმებსაც ვაწყობდი. 9 აპრილის ტრაგედიამ მნიშვნელოვნად შემიცვალა გეგმები და ხედვა მომავლისადმი. საბჭოთა ჯარის სისასტიკემ თბილისში, რუსთაველის გამზირზე ქართველებში პროტესტის გრძნობა გამოიწვია. ეროვნული მოძრაობის ტალღამ მოიცვა სრულიად საქართველო და გამონაკლისი არც აფხაზეთი აღმოჩნდა. თუმცა, აღსანიშნავია ის ფაქტიც, რომ აფხაზეთში ძნელად იკიდებდა ფეხს მოძრაობა.

1989 წლის მაისში, ჩვენი, კოჩარელი მოსწავლეებისა და ახალგაზრდების ხმაც შეუერთდა დედაქალაქში მოგუგუნე პროტესტანტების ხმას. მიუხედავად სასტიკი წინააღმდეგობისა იმდროინდელი ადგილობრივი ხელმძღვანელობისა და აფხაზური მოსახლეობისა აზრადაც არ მოგვსვლია უკან დახევა. დღევანდელი გადასახედიდანაც ვთვლი, რომ ჩვენ ვიყავით ის თაობა, ვისაც უნდა დაეწყო უკომპრომისო ბრძოლა საქართველოს დამოუკიდებლობის მოსაპოვებლად. 9 აპრილი გამორჩეულად მნიშვნელოვანი თარიღია ჩვენი ქვეყნის ისტორიაში. ის მხოლოდ 25 თებერვალს უტოლდება. ამიტომაც ქართველები ვალდებულნი ვართ ამ თარიღის წინაშე ბოლომდე მივიყვანოთ დაწყებული ბრძოლა ვიდრე საქართველო ღირსეულ ადგილს არ დაიმკვიდრებს ცივილურ სამყაროში. ეს იქნება 9 აპრილის გმირების უკვდავყოფა,"- აცხადებს ჩვენთან საუბარში მაკა ბელქანია.