COVID-19-ის შემაკავებელი ზომების გამო შანხაისა და პეკინში საპროტესტო აქციებია
კვირას, 27 ნოემბერს შანხაის ქუჩებში გაიმართა აქციები, რომელთა მონაწილეებსაც ხელში უწარწერო ქაღალდები ეჭირათ და აპროტესტებდნენ COVID-19-ის შესაკავებლად მოქმედ მკაცრ ზომებს - იმ ფონზე, როცა ქვეყნის შორეულ დასავლეთში მომხდარმა ხანძარმა, რომელსაც მსხვერპლი მოჰყვა, ქვეყნის მოქალაქეებში ძლიერი სიბრაზე გამოიწვია.
სამოქალაქო დაუმორჩილებლობის ტალღა, რომელიც მოედო პეკინსაც და ურუმჩისაც - სადაც ხანძარი მოხდა - უპრეცედენტოა ჩინეთში მას მერე, რაც ათწლეულის წინ ხელისუფლებაში სი ძინპინი მოვიდა.
შანხაიში მოქალაქეები შაბათს საღამოს შეიკრიბნენ, რათა პატივი მიეგოთ ხანძრის მსხვერპლთა ხსოვნისთვის, და ეს შეკრება კვირას, გამთენიისას საპროტესტო აქციაში გადაიზარდა. სოციალური ქსელებით გავრცელებულ ვიდეოჩანაწერში ისმის, რომ დემონსტრანტები სკანდირებდნენ "გააუქმეთ ლოკდაუნი ურუმჩიში, სინიანში, მთელს ჩინეთში!". არის ცნობები, რომ დემონსტრანტები გამოდიოდნენ მოწოდებებით ჩინეთის კომუნისტური პარტიისა და ლიდერის, სი ძინპინის წინააღმდეგაც.
ჩინეთი მისდევს სი ძინპინის პოლიტიკას, რომელიც COVID-ის სრულად აღმოფხვრას მიემართება, მაშინაც კი, როცა დანარჩენი მსოფლიოს დიდ ნაწილში შეზღუდვათა დიდი ნაწილი მოიხსნა. გლობალური სტანდარტებით, ჩინეთის ამჟამინდელი მაჩვენებელი მაღალი არ არის, თუმცა ის მატულობს, შაბათს ინფიცირების ახალი შემთხვევების რიცხვი 40,000 იყო.
ჩინეთი აცხადებს, რომ ეს პოლიტიკა აუცილებელია საიმისოდ, რომ ადამიანები გადარჩნენ და არ გადაიტვირთოს ჯანდაცვის სისტემა. ოფიციალური პირები აცხადებენ, რომ ამ პოლიტიკას კვლავ გაატარებენ, საზოგადოებრივი უკმაყოფილების და ეკონომიკაზე მისი უარყოფითი შედეგების მიუხედავად.
სიახლეები
- "სანქციები რომ დააკისრონ ქვეყანას და ხალხს, ეს მიდგომა არასწორია"- ირაკლი ღარიბაშვილი
- "თურქეთი საქართველოს ევროატლანტიკურ სივრცეში გაწევრიანების მომხრედ რჩება და როგორც ადრე, ახლაც ისტორიის სწორ მხარეს დგას"
- პრეზიდენტმა „უცხოური გავლენის გამჭვირვალობის შესახებ” კანონს ვეტო დაადო
- "გავიგე, რომ ნატა ფერაძეს ოჯახთან ერთად მოუწია ქვეყნის დატოვება, რადგან დაჭერას უპირებდნენ სახელმწიფო გადატრიალების ბრალდებით"
- "პრეზიდენტად წოდებულს, ქალბატონს, რომ არ აინტერესებს კონსტიტუცია, ქვეყნის ინტერესები, ცხადი" - ირაკლი ღარიბაშვილი