ოჯახში და ქალთა მიმართ ძალადობის ფაქტებზე არასათანადო რეაგირების გამო, დისციპლინური სახდელი დაეკისრა რვა პოლიციელს.

ადამიანის უფლებათა დეპარტამენტის დირექტორის, ლონდა თოლორაიას თქმით,  ოჯახური დანაშაულისა და ქალთა მიმართ ძალადობის შესახებ მომართვიანობა გაზრდილია, რაც სამართალდამცავი ორგანოების მიმართ ნდობის ამაღლებით არის განპირობებული.

„გაზრდილია გამოძიებისა და სისხლისსამართლებრივი დევნის დაწყების, აგრეთვე, გამოცემული შემაკავებელი ორდერების მაჩვენებელი: 2017 წელს გამოძიება დაიწყო 2 828 საქმეზე, ხოლო 2018 წელს - 4 339 საქმეზე. 2017 წელს სისხლისსამართლებრივი დევნა დაიწყო 1 986, ხოლო 2018 წელს 3 000-მდე პირის მიმართ.

2017 წელს გამოცემულ იქნა 4 370, 2018 წელს კი  5 472 შემაკავებელი ორდერი“, - განაცხადა ლონდა თოლორაიამ.

ადამიანის უფლებათა დაცვის დეპარტამენტი, შინაგან საქმეთა სამინისტროს სისტემური განახლების ფარგლებში, 2018 წლის იანვარში შეიქმნა. დეპარტამენტი ოჯახური დანაშაულის, ქალთა მიმართ ძალადობის, დისკრიმინაციული ნიშნით და სიძულვილით მოტივირებული დანაშაულის, ტრეფიკინგის, არასრულწლოვანთა მიერ და მათ მიმართ ჩადენილი დანაშაულის ფაქტებზე მიმდინარე გამოძიებისა და ადმინისტრაციული საქმისწარმოების მონიტორინგს ახორციელებს.